Azərbaycan yığması DÇ-2026 seçmə mərhələsindəki çıxışına yekun vuruldu.
Forvard.az xəbər verir ki, Azərbaycan seçməsi son oyununda doğma divarlar arasında Fransaya məğlub oldu. Matçı izləyənlər arasında vaxtilə “Azal” və “Turan”da çıxış etmiş veteran gürcü futbolçu Nüqzar Kvirtiya da vardı. Çempionatımızda çıxış etmiş futbolçu ilə söhbət etdik.

- Yığmamızın Fransa ilə oyununu necə qiymətləndirərdin?

- Azərbaycan seçməsi matça çox yaxşı qoşuldu, ilk hücumdaca erkən qol vurdular. Belə gedişatı çoxları gözləmirdi. Azərbaycanlılar matça yaxşı köklənmişdilər, amma bu bütün 90 dəqiqədə öz müsbət təsirini göstərmədi. Fransanın heyətindəki oyunçular daha təcrübəlidirlər, onlar aparıcı futbol klublarında çıxış edirlər. Ona görə də səviyyə fərqi sözünü dedi.

-Necə düşünürsən, Ayxan Abbasovun gəlişiylə yığmamızda sıçrayış varmı?

- Hazırkı komandaya müəyyən qədər vaxt lazımdır. Yeni formalaşan heyətdir, gənc oyunçular var. Düşünürəm ki, bir seçmə mərhələdə də hazırkı baş məşqçi və futbolçulara şans verilsə, inkişafa nail olmaq olar. Azərbaycan millisi daha yaxşı oynamağa layiqdir.

- Ermənistan millisi Portuqaliyaya 9:1 hesabıyla məğlub oldu. Həm bizimlə, həm də onlarla qonşu olan ölkənin nümayəndəsi kimi hayların böyükhesablı məğlubiyyətilə bağlı nə deyərdin?

- Yəgin, Ronaldo oynamadığı üçün belə nəticə qeydə alınıb (gülür). Bu yaxınlarda bir erməninin şərhini oxudum. O, qeyd edir ki, Gürcüstan yaxşı çıxış edir, hətta Azərbaycan seçməsi də yaxşı oynamağa başlayıb, amma Ermənistan millisi oynamır və tənəzzülə gedir. Görünür, ermənilərin problemləri var. Azərbaycanda yaşadığımdan onların hansı problemləri olduğunu və Ermənistanda nələr baş verdiyini deyə bilmərəm.

- Premyer Liqamızda I dövrə arxada qaldı. Fikirlərin maraqlıdır...

- Çempionat öz axarında gedir, xüsusi bir süpriz görmədik. Həmişəki kimi "Qarabağ" dominantlıq və liderlik edir. "Atlılar' artıq 2 yox, 3-4 baş digər klublardan güclüdür. Digər komandalar da ağdamlılar kimi inkişafa nail olsalar, daha rəqabətli Premyer Liqa izləyərdik.


ABDULLA İSMAYILOĞLU