Premyer Liqanın I dövrəsinin yekunlaşdı. Həm klubların çıxışı, həm də futbolçuların performansı ilə bağlı veteran futbolçu Xəqani Məmmədovun Forvard.az – a fikirlərini açıqladı:

“Çox gərgin mübarizəli və maraqlı I dövrə izlədik. Demək olar ki, hər bir komanda asan təslim olmur və sona qədər döyüşürdü. “Qarabağ” həm iki cəbhədə mübarizə aparması, həm də klublarına onlara qarşı xüsusi motivasiya ilə oynamaları ağdamlıların işini bir xeyli çətinləşdirdi. Ona görə də ilk dövrədə “atlılar” üzərində böyük təzyiqi gördük. Düşünürəm ki, bu təzyiq qarşıdakı dövrədə də davam edəcək. İlk “4-lük”də yer almaq uğrunda “Araz-Naxçıvan”, “Sumqayıt”, “Turan Tovuz”, “Zirə”, “Sabah” arasında gərgin mübarizə getdi. Bu çarpışma qarşıda dövrələrdə də davam edəcək və daha dramatik hal alacaq. İkinci “6-lıq”da “Şamaxı”, “Neftçi”, “Qəbələ”, “İmişli”, “Karvan-Yevlax”, “Kəpəz” isə turnir cədvəlində maksimum yuxarı qalxmaq üçün döyüşürlər. Adı çəkilən komandalar arasında “Karvan-Yevlax” ilə “Kəpəz”də nələrsə yerində deyil. Təbii ki, adı çəkilən klublarında içərisində hansı problemlərin olduğunu ən yaxşı rəhbərlikləri və baş məşqçiləri bilir. Onların işinə qarışmaq, müdaxilə etməyə ixtiyarımız yoxdur. Amma Yevlax və Gəncə təmsilçisində mütləq nələrisə dəyişmək lazımdır. Bu baş versə, hər iki komanda özünü yaxşı tərəfdən göstərəcək. Futbolçuları fərqləndirməyə gəlincə, legionerlərdən “Araz-Naxçıvan”dan Şarl Boli, “Turan Tovuz”dan Aleks Souza, “Sabah”dan Stiv Solvet özünü yaxşı tərəfdən göstərir. Həmçinin “Sumqayıt”da çıxış edən Aleksandr Ramalinqom da hücumda kreativliyi və vurduğu qolları ilə xoş sözlərə layiqdir. Yerlilər “Qarabağ”dan Elvin Cəfərquliyev ilə Toral Bayramovu, “Sabah”dan isə Xəyal Əliyev və Rəhman Daşdəmirovu qeyd edərdim”.

ABDULLA İSMAYILOĞLU