II Liqanın 7-ci turunda “Şirvan” Quba səfərində büdrədi. Bölgə təmsilçisi 5 oyunluq qələbə seriyasından sonra “Quba PFK” ilə 1:1 heç-heçə razı oldu. Bu xal itkisi ilə bağlı şirvanlıların baş məşqçisi Pərviz Bayramov Forvard.az – a fikirlərini açıqladı:

“Uğur seriyamızı davam etdirmək istəyirdik. Amma 7-ci dəqiqədə aldığımız qırmızı vərəqə bütün planlarımızı pozdu. Buna rəğmən ilk yarıda ilk qolu biz vurduq, amma fasilə ərəfəsində də meydan sahibləri status-kvovu bərpa etdi. İkinci yarıda rəqib bütün gücü ilə təzyiq göstərdi, azlıqda qalmağımıza, B planına keçdiyimizə və hədsiz çox güc sərf etdiyimizə görə gücümüz məğlub olmamağa çatdı. Rəqib də aqressiv və istəkli idi. Qırmızı vərəqə almasaydıq, matçın gedişatı fərqli ola, qələbə qazana bilərdik. Səhvlərimizi analiz edərək qarşıdakı oyunlarda qələbələr qazanmağa çalışacağıq”.

ABDULLA İSMAYILOĞLU