“Neftçi” media partnyorluğu və etik dilemmalar. Hadisəyə obyektiv baxaq.

“Neftçi” futbol klubunun media tərəfdaşlarından biri ilə əməkdaşlığı dayandırması ictimai müzakirələrə səbəb olub. Hadisənin mərkəzində baş məşqçi Samir Abasovun hakimlər otağının qarşısından keçərkən söyüş söyməsini əks etdirən videonun yayımlanması dayanır. Videodan sonra AFFA klubu 10 min manat cərimələyib, baş məşqçi isə 4 oyunluq cəza alıb. Klub həmin görüntülərin silinməsini partnyor saytdan xahiş etsə də, müraciət cavabsız qalıb və nəticədə əməkdaşlıq dayandırılıb.

Məsələ ilk baxışdan söz azadlığı kontekstində qiymətləndirilsə də, əslində hadisə daha çox media etikası, kommersiya tərəfdaşlığı və qarşılıqlı etibar məsələlərinin kəsişməsində dayanır.

Klubun mövqeyinə görə, tənqidə açıq olmaqla yanaşı, partnyorluq çərçivəsində qarşılıqlı məsuliyyət də olmalıdır. Sayt klubdan maliyyə dəstəyi aldığı halda, onun həm reputasiyasına, həm də maliyyə durumuna birbaşa zərər vuracaq görüntünü yayması etik suallar doğurur.

Videonun yayılması nəticəsində:

Klub AFFA tərəfindən cərimələnib.
Baş məşqçi cəzalandırılıb.
Komandanın imicinə zərbə dəyib.

Bu, media partnyorlarının qarşılıqlı maraqları nəzərə almalı olduğu prinsipinə zidd addım kimi qiymətləndirilə bilər.

Sızdırılan vatsap yazışması və əlavə gərginlik yaradan məqam...

Əməkdaşlığın xitamından sonra sayt rəhbərinin “Neftçi” rəsmisi ilə vatsap yazışmasının skrinşotunu ictimaiyyətə təqdim etməsi məsələyə yeni çalar qatıb.

Skrinşotda klub rəsmisi “Zəhmət olmasa, silək” sözləri ilə videonun silinməsini xahiş edir, ardınca isə klubun tənqidə açıq olduğunu vurğulayır.

Bu paylaşım iki vacib sual yaradır:

Niyə partnyor münasibəti davam etdiyi dövrdə deyil, əməkdaşlıq dayandırıldıqdan sonra paylaşılır?

Sirr saxlanmasına dair etik öhdəliklər partnyorluq bitən kimi aradan qalxırmı?

Tərəfdaşlıq münasibətlərində daxili yazışmaların ictimailəşdirilməsi ümumilikdə qeyri-peşəkar davranış hesab olunur. Bu, tərəfdaşlar arasında etibarın tam qırılması anlamına gəlir.

Söz azadlığı pozulurmu?

Bu hadisə dövlət tərəfindən senzura və ya təzyiq olmadığı üçün söz azadlığı pozuntusu kateqoriyasına daxil deyil. Burada iki özəl tərəf arasında kommersiya münasibətindən söhbət gedir. Sayt videonu silməməkdə tam hüquqludur. Klub əməkdaşlığı dayandırmaqda tam hüquqludur. Bu, tərəflərin hüquqi seçimidir, söz azadlığı müstəvisində təzyiq kimi qiymətləndirilə bilməz.

Etik tərəf: Kim haqlıdır?

Ədalətli yanaşma belədir: Saytın redaksiya müstəqilliyini qorumaq hüququ var. Amma partnyorluq çərçivəsində klubun zərərinə səbəb olan kontenti yayması etik suallar doğurur.

Ən ciddi məsələ əməkdaşlıq bitdikdən sonra vatsap yazışmasını paylaşmasıdır. Bu, media etikası baxımından ciddi problem kimi görülür.

Klub videonun silinməsini xahiş etməkdə normal davranıb. Tənqidə açıq olduğunu skrinşotda da göstərib.

Partnyorun zərərli kontent yaymasından sonra əməkdaşlığa xitam verməsi həm kommersiya, həm PR baxımından izah ediləndir.

Hadisə söz azadlığından daha çox media etikası və tərəfdaşlıq mədəniyyəti ilə bağlıdır. Burada tərəflərin hər biri hüquqi olaraq öz mövqeyində haqlı olsa da, etik baxımdan saytın davranışı, xüsusilə yazışmaların ictimailəşdirilməsi daha çox sual doğurur.

Bu situasiya bir daha göstərir ki, media partnyorluğu yalnız informasiya mübadiləsi deyil, həm də qarşılıqlı etibar, peşəkarlıq və məsuliyyət tələb edən bir münasibətdir.

Ümumilikdə isə klubun üzərinə aqressiv şəkildə istiqamətin alınması labüd hesab edilmir.

Forvard.az