I Liqanın XXII turunun mərkəzi görüşü İmişlidə baş tutdu. Gərgin keçən “İmişli” – “Qəbələ” matçında meydan sahibləri erkən qolu oyunun taleyini həll etdi. Bununla da “qırmızı-qaralar”ın mövsümdəki məğlubiyyətsiz seriyasına son qoyuldu. Qarşılaşmadan sonra “İmişli”nin icraçı direktoru Aqşin Mürsəlov Forvard.az – a danışdı.

“Bizim üçün çox prinsipial və gərgin matç oldu. Belə ki, mövsümdə “Qəbələ”yə qarşı xüsusi motivasiya ilə oynamışdıq. Əvvəlki, iki oyunumuza baxsaz, çox yaxşı mübarizə aparmışdıq. VI turda səfərdə “qırmızı-qaralar”la heç-heçə etmiş, XIV turda isə doğma divarlar arasında nə qədər döyüşkən futbol sərgiləsək də, yekunda 1:2 hesabıyla məğlub olmuşduq. Onu xüsusi vurğulayım ki, bu il “Qəbələ”yə qarşı oyunlarda tarix yazmışıq. Qəbələlilərin qapısından ilk qolu keçirən məhz komandamız olub. Bizə qədər rəqib 13 oyun idi quru seriyasını davam etdirirdi. Bu gün isə doğma meydanda onlara yenidən qol vurmaqla yanaşı qələbə qazandıq və “Qəbələ”nin məğlubiyyətsiz oyunları seriyasını qırdıq. İkiqat sevincliyik. Ümid edirəm ki, qarşıdakı 5 oyunda da qələbə seriyamızı davam etdirərək 2-ci pillədəki yerimizi qoruyaq. Komandamızı və dəstəyini əsirgəməyən fanatlarımızı təbirk edirəm. “Qəbələ” üzərində qələbə ilə rayonumuza futbol bayramı bəxş etdik”.

ABDULLA İSMAYILOĞLU