Təşkilatların, birliklərin məqsəd və məramından asılı olmayaraq onların media qurumları ilə münasibətlərini tənziməyən, o cümlədən mətbuatın təzyiqlərindən qoruyan mətbuat katibləridir. Mətbuat katibi həm də jurnalistlər, blogerlər və digər bu kimi kəsimlərlə körpü rolunu oynayır. Dediklərim futbol klublarının sözçülərinə də aiddir.

Təəssüflər olsun ki, Premyer Liqa təmsilçilərimizin bəzi mətbuat başqanları işlərində olduqca səriştəsizliyə yol verir, media və ictimaiyyətlə əlaqələrdə laqeydlik, hörmətsizlik sərgiləyirlər. Özlərini elə aparırlar ki, sanki Everestin uca zirvəsini bunlar fəth ediblər, Azərbaycanda isə xan, ağa sinfinə mənsubdurlar və heç kimi saymırlar. Məsələn, “Qarabağ”ın Media və ictimaiyyətlə əlaqələr departamentinin rəhbəri Anar Hacıyev özünü orta əsrlərin “xozeyn”i kimi aparır. Adamdan sorğu alanda, klubun idarə heyətində yer alanlardan və futbolçulardan müsahibə götürmək üçün müraciət edəndə özünü eşitməzliyə vurur, telefon zənglərinə, mesajlara cavab vermir. Sanki qarşımızdakı feodal ağa biz isə miskin, heç bir hüququ olmayan kəndlilərik. Bu azmış kimi, o, miks zonadan bütün futbolçuların keçidi təmin etməli olduğu halda, bu öhdəliklərinə də laqeydlik edərək: “Futbolçu danışmaq istəmirsə, mən onların keçidini təmin etməyə bilərəm” - deyə PFL əsasnaməsini saymır (yazı etikası imkan vermir deyə, bu məqamda yerində işlənən digər ifadələri yazmıram). “Atlılar”ın sözçüsünün forsu, təkəbbürü, hörmətsizliyi pik həddədir. Halbuki Anar Hacıyev “Qəbələ”də eyni vəzifədə çalışarkən, özünü sadə, təmkinli aparar, jurnalistlərin stadionlardan fəaliyyətlərini rahat aparması üçün əlindən gələni əsirgəməzdi. Elə edərdi ki, nə şiş, nə də kabab yanardı. İndi isə o, vəzifə borcunun, peşə etikasının yazılı və yazılmayan qanunlarını yandırıb, ayaqlarını da aşırıb kabab tıxışdıran harın məmurları xatırladır. Anlamır ki, bu eqoizm “zirvə”sindən bir gün endiriləcəksən...

“Sumqayıt”ın mətbuat katibi Zaur Xudiyevin də davranışlarından baş açmaq olmur. Dünənə kimi “kimyaçılar” ardıcıl oyunlarda nəsibləri məğlubiyyət olub, dalana dirənəndə klub sözçüsü həmkarlarından qaçırdı. Hazırda Sumqayıt təmsilçisi uğurlu çıxışına görə Zaur “həzrət”lərinin qəbuluna düşmək olmur. Bəs onu məşğul edən nədir ki, jurnalistlərin telefon zənglərini, vatsap mesajlarını qulaq ardına vurur?! Sən demə, “Sumqayıt”ın eynəkli rəsmisinin iş-gücü müxtəlif pozalarda şəkillər çəkdirib sosial şəbəkələrdə paylaşmaqdıq. Görünən odur ki, Zaur “əfəndi” bu yaşında özünü Corc Kuliniyə, Daniyel Dey-Lüis, Cud Lou kimi aktorlara, müğənni Aleksandro Safinaya oxşatmaq “eşq”inə düşüb.

Ay Zaur Xudiyev, qazaxlılar və Borçalıdan olan yerlilərin demiş “əziz başın, təpən haqqı səndən bu yaşında nə aktyor, nə də model olasıdır”. Odur ki, xam xəyallarından ayıl və ölkənin üçüncü böyük şəhərinin klubunda mətbuat katibi olduğunu anla...

Ay vəzifəyə “təyin” olunanlar, hərdən bir jurnalist keçmişinizə nəzər salın və sizin hazırkı əməllərinizi mətbuat katibləri sizə qarşı etsəydi, özünüzü necə hiss edərdiz deyə düşünün. Əgər düşünmə və analiz vərdişlərini unutmamısınızsa...

Vüsal İmanov