Ötən gün “Qarabağ” doğma meydanda “Zirə”ni 4:0 hesabla darmadağın etdiyi oyundan sonra “köhlən atlar”ın futbolçusu Toral Bayramov qarşılaşmayla bağlı Forvard.az-a danışıb.

- Avropa Liqasında və ölkə çempionatında ardıcıl iki qələbə qazandız. Fikirlərin maraqlıdır...

-Avropa Liqasında geridönüş etməyin zamanı gəlmişdi. Ardıcıl 3 oyunda məğlub olduqdan sonra başqa çıxış yolumuz yox idi. Ona görə hamı bir yumruq kimi birləşib hakimin final fitinə kimi əzmkarlıq sərgilədi və layiq olduğumuz qələbəni qazandıq. Həmçinin Premyer Liqayada da ciddi yanaşırıq. Bu mövsüm çempionatda ciddi rəqabət var. “Araz-Naxçıvan”, “Turan Tovuz”, “Zirə” və digər klublarımızın işdahı artıb. Addım-addım bizi izləyirlər. Ona görə bu gün qələbə qazanmaqla rəqiblərimiz arasında xal fərqinin azalmasına imkan verməməliydik. Şükürlər olsun ki, bunu bacardıq.


-“Bude Qlimt”ə vurduğun qol ilə Avropada diqqət mərkəzinə düşdün. Səncə, bundan sonra daha güclü çempionatlardan, o cümlədən top-liqa təmsilçilərindən dəvətlər gözləyirsənmi?

-Düşünmürəm ki, bir qol futbolçunu top-liqa çempionatlarına daşısın. Top komandalarda oynamaq üçün bu kifayət deyil. Həmçinin bu dəqiqə daha çox performansımı daha da artırmaq və “Qarabağ”a fayda vermək haqqında düşünürəm.

-Norveç təmsilçisinə vurduğul qol ən gözəl yoxsa gözəllər sırasındadır?

-Qısaca belə deyim, gözəl və vacibdir.

-Avropa Liqasında ilk qələbənizi qazandız. Bundan sonra nəyə fokuslanacaqsız?

-Biz hansı turnirdə çıxış etməyimizdən asılı olmayaraq, məqsədimiz və məsuliyyətimiz dəyişməzdir. İstər Premyer Liqa, istərsə də avrokuboklarla maksimum irəli getmək və yaxşı nəticələr qazanmaq fikirindəyik. Odur ki, hədəfimiz dəyişməz olaraq qalır.

ABDULLA İSMAYILOĞLU