Cavid Hüseynovun "Səbail"ə keçidi rəsmiləşəndən sonra gənc mütəxəssisin yeni komandasında uğur qazanacağına inanlar çoxdu. Onlardan biri də vaxtilə onunla birgə çalışmış Elhad Nəziridir. Yığmamızın sabiq üzvü Cavid Hüseynovun "dənizçilər"in sükanı arxasına keçməsiylə bağlı Forvard.az-a bunları deyib:

"Cavid Hüseynovla məşqçilik karyeramıza birlikdə başlamışıq, 3-4 il çiyin-çiyinə çalışmışıq. Hətta mənim də məşqçi kimi formalaşmağımda Cavid Hüseynovun danılmaz rolu var. "Səbail" rəhbərliyi yığmamızın sabiq üzvünü baş məşqçi postuna gətirməklə çox düzgün qərar verdi. Düşünürəm və inanıram ki, Cavid müəllim yeni komandasında işinin öhtəsindən layiqincə gələcək. Ümumi götürəndə çox istəyirəm ki, Premyer Liqamızda və ölkə futboluna gənc məşqçilərimizə daha çox şans verilsin. Yetəri qədər savadlı, bacarıqlı, ölkə futboluna yaxından bələd olan gənc mütəxəssislərimiz var. Hazırda Cavid Hüseynovla yanaşı digər həmyaşıdımız Vaqif Cavadov da "Sumqayıt"ın sükanı arxasındadır. Hər iki məşqçilərimizə uğurlar arzu edirəm".