Ayxan Quseynov: "Bəxtimiz gətirmədi"

Ötən gün "Turan Tovuz" səfərdə "Səbail"dən bir xalı çətinliklə qopararaq 1:1 hesablı sülhə razılaşdı. Oyundan sonra bölgə təmsilçisinin üzvü Ayxan Quseynov Forvard.az - a müsahibə verib.

- Gərgin keçən 90 dəqiqəylə bağlı fikirlərin maraqlıdır...

- Bu gün çətin oyun oldu. "Səbail" mövsümdə ən yaxşı oyunlarından birini keçirdi. Nə qədər çalışsaq da, meydanda istədiyimizi tam qoya bilmədik. Yetəri qədər matça konsentrasiya ola bilmədik. Penaltini vura bilmədik, qolumuzu saymadılar. Bəxtimiz də gətirmədi. Amma sonra məğlubiyyətdən qaça bildiyimizə sevinirəm.

- Komanda yoldaşın Kristian Da Silva 11 metrəni dəqiq vura bilmədi, qayıdan topu tora qovuşdursanda, qol hesaba alınmadı və oyundan kənar vəziyyət kimi qimətləndirildi. Səncə, ofsayt vardımı?

- Bir qədər irəlidəydim. Amma rəqib futbolçular da məndən irəlidəydi. Düşünürəm ki, orda ofsayt ola bilməzdi. Təbii ki, hakimlər oyundan kənar vəziyyəti qeydə aldılar. Deyiləcək nəsə yoxdur. Referilərin işini müzakirə etmək istəmirəm.

- Səncə, Kristan qol vursaydı, oyunun nəticəsi fərqli olacaqdımı?

- Düşünürəm ki, fasilə ərəfəsində hesabı bərabərləşdirsəydik, psixoloji üstünlüyə sahib olacaqdıq və ikinci hissədə fərqli motivasiya ilə oynayacaqdıq. Meydanda açıq futbol gedəcəkdi.

- Səncə, 1 xal qazandız yoxsa 2 xal itirdiz?

- Qələbə üçün çalışsaq da, alınmadı. Amma məğlubiyyətdən də qaça bildik. Ümumi götürəndə isə 2 xal itirdik.