Misli Premyer Liqası klublarının futbolçuları arasında ən çox ötürmə verənlər bəlli olub.

İdman.biz ölkə çempionatında ötürmələrin sayı və keyfiyyəti ilə bağlı digər statistik göstəriciləri nəzərdən keçirib.

Ötən 11 turda ən çox ötürmə verən Murad Xaçayevdir (“Sumqayıt”) - 711. Sonrakı iki göstərici də onun komanda yoldaşlarındadır. Elvin Bədəlov 666, Səbuhi Abdullazadə 583 ötürmə verib. Sumqayıtlı futbolçularla bu sahədə daha yaxından rəqabət aparan Ruan Renato (“Zirə”, 573) və Aleksey İsayevdir (“Qarabağ”, 567).

Ötürmələrin dəqiqliyinə gəldikdə, 100 faizli göstərici yalnız Sergey Samokdadır. Ancaq “Turan Tovuz”un qapıçısı oynadığı 2 matçdakı 90 dəqiqədə cəmisi 6 ötürmə verib. 94,59% dəqiqliyə malik David Qomis də (“Səbail”) cəmisi 74 ötürmə verib və 70-də dəqiq olub.

200-dən çox ötürməsi olanlar arasında ən sərrastı Kevin Medinadır. “Qarabağ”ın müdafiəçisi 94,42 faizlə ümumi siyahıda yuxarıda adları çəkilən iki futbolçudan sonra 3-cüdür. Onun 269 ötürməsindən 254-ü dəqiq olub. 500-dən çox ötürməsi olanların lideri 93,83 faizlə ümumi siyahıda 6-cı olan Aleksey İsayevdir. “Qarabağ”ın bu futbolçusu 567 ötürməsindən 532-ni dəqiq ünvana çatdırıb. Murad Xaçayev isə ötürmələrin sayının çoxluğuna baxmayaraq, siyahıda 32-cidir. “Sumqayıt”ın futbolçusunun 711 ötürməsindən 635-i, yəni 89,31%-i dəqiq olub.

Qeyri-dəqiq ötürmələri ilə seçilən futbolçular Ervin Koffi (“Neftçi”) və Felipe Santosdur (“Araz-Naxçıvan”). Onların hərəsinin 88 ötürməsi ünvana çatmayıb.

Uzun ötürmələrdə 100 faizli göstəriciyə malik 15 futbolçudan ən çox ötürmə sayı cəmi 9 ötürməsi olan Azər Əlyevdədir (“Neftçi”). Ən çox dəqiq uzun ötürmə sayı (58) Bəxtiyar Həsənəlizadədə (“Araz-Naxçıvan”) olduğu halda, onun ən yaxın izləyicisi – 52 dəqiq uzun ötürmə verən Elvin Bədəlov (“Sumqayıt”) 20-dən çox belə ötürməsi olan futbolçular arasında ən yüksək dəqiqlik faizinə malikdir – 75,36.

Qol ötürmələrində ən çox fərqlənən Boyan Letiçdir (“Sabah”) – 6. Ayman Boualidə (“Səbail”) bu göstərici 4, Toral Bayramov (“Qarabağ”) və Rüstəm Əhmədzadədə (“Zirə”) 3-dür.

Komanda göstəricilərinə gəldikdə, orta hesabla hər oyuna ən çox dəqiq ötürmə edən “Qarabağ”dır – 486,7. “Sumqayıt”da bu göstərici 397, “Zirə”də 390,3-dür. Ən aşağı göstərici “Şamaxı”dadır – 198,9.

Uzun ötürmələrdə lider “Zirə” və “Sumqayıtdır” – 28. “Araz-Naxçıvan” 3-cüdür – 27,2. Ən aşağı göstərici “Neftçi”dədir – 19,1.

Vüqar Məmmədov