Bildiyiniz kimi Azərbaycan Kanoe və Avarçəkmə Federasiyası bundan əvvəl işğaldan azad olunan ərazimizdə, Suqovuşanda beynəlxalq yarışlar təşkil edib. “Mingəçevir reqatası” və “Prezident kuboku” azad olunan ərazilərimizdə təşkil olunan ilk geniş miqyaslı və beynəlxalq idman yarışı idi.

Bu sözləri Azərbaycan Kanoe və Avarçəkmə Federasiyası”nın nümayəndəsi Vüsal Qurbanov Forvard.az-a açıqlamasında deyib. Qeyd edib ki, Füzulidə ilk dəfə beynəlxalq yarış təşkil ediləcək:
“Federasiyamız bu dəfə də ilkə imza atıb. ”Mingəçevir reqatası” ilk dəfə olaraq Füzulidə Köndələnçay su anbarından start götürəcək. Yarışlarda ümumilikdə 12 ölkədən 15 komanda iştirak edir. Əlbəttəki “Mingəçevir reqatası”nın nüfuzu beynəlxalq səviyyədə hər ötən il daha da artır. Bu baxımdan iştirak edəcək idmançılar bu il daha təcrübəlidir. Bu dəfə idmançılarımızdan daha yaxşı nəticələr gözləyirik. Ədalətli idman mübarizəsi şərtilə biz əzmkar yürüşlər izləyəcəyimizə inanırıq və ümid edirik ki, idmançılarımız gözlənilən nəticələri göstərəcək”.

Federasiya numayəndəsinin sözlərinə görə, idmançıların praktika və təcrübələrinin çox olması önəmli cəhətlərdən biridir:
“Ötən il ilə müqayisədə idmançılarımız həm fiziki, həm də praktiki cəhətdən inkişaf ediblər. Yarışlar həmyaşıd yeniyetmə və gənclər arasında keçirilir. Yeniyetmələr üçün təşkil olunan avarçəkmə yarışlarına mükafat qoymaq nəzərdə tutulmur. Burada əsas məqsəd gənclərin təcrübə toplamasıdır. Xarici gələn komanda ilə birgə yarışmaq idmançılarımızın gələcək beynəlxalq yarışlar üçün təcrübəsinə böyük təkan verəcək. Onlar arasında seçilən idmançılar gələcəkdə milli komandanın təşkilində böyük rol oynayacaq. Rəqabətə davamlı, güclü komanda formalaşdırılacaq”, - deyə o, bildirib.

Qeyd edək ki, "Mingəçevir Reqatası 2024" 16-18 oktyabr tarixlərində Füzüli və Mingəçevirdə baş tutacaq.

Maya Hüseynova