Futbol üzrə Azərbaycan Premyer Liqasının ilk 3 turu artıq geridə qalıb. Bu müddətdə “Kəpəz” tam acınacaqlı durumda qalıb. 3 oyunda 11 qol buraxan Gəncə klubu turnir cədvəlinin son pilləsindədir və hələ də xal qazana bilməyib.

Bir neçə ay əvvəl sponsor məsələsi həll olunan, infrastruktur baxımından irəliləyişlər gözlənilən klubun durumu daha da pisləşib. İdarəçilikdə xaos hökm sürür, komandanın heyətinə cəlb olunan futbolçular meydanda bərbad təsir bağışlayırlar. Futbol adına yalnız forma görünür, oyun isə yox.

Üstəlik, “Kəpəz”in arxasında dayanan “Unibank” kimi böyük sponsorun belə bir komanda ilə çıxış etməsi də ictimaiyyətdə təəccüb doğurur. Sponsorluq imici yüksəltməli olduğu halda, bu gün “Kəpəz”in nəticələri daha çox başqa mövzulu suallara yol açır.

Klub daxilində məscəb itib, rəhbərlik kimdir, kim qərar verir, aydın deyil. Bir çoxları “Kəpəz”in ağır vaxtında nəticə verən Azər Bağırovun haqqının yeyildiyini düşünür. Amma illərdir Gəncə klubunda haqsızlıqların davam etməsi də sirr deyil.

Gəncənin futbolsevərləri bu durumdan narazıdır. Azərbaycanın ən böyük futbol şəhərlərindən biri futbolsuz qalıb. “Kəpəz”in indiki oyunu isə nə şəhərə, nə də tarixə yaraşır.

Sonun necə olacağı bilinmir, amma yaxşı heç nə vəd etmir...


Elvin Abdullayev
Forvard.az