“Kəhər”in gəlişi: simvol yoxsa zarafat?

“Qarabağ” klubunun yeni maskotu təqdim olunub. Adı “Kəhər”dir. Səhnəyə çıxış tərzi, görünüşü və simvolikası ilə az qala sosial şəbəkələrin zarafat mövzusuna çevrilib. “İlk dəfə stadiona gəldi” deyə təqdim edilən bu fiqur əslində klubun uzun illərdir imic və brendinq məsələsində nə qədər səthi düşündüyünü bir daha sübut etdi.

Baxaq. Qarabağ atı simvol seçilib, bu gözəldir. Amma görünüş? Dəri maskası xatırladan başlıq, gülməli ayaqqabılar, qəribə formalı qollar, məna yükü olmayan mimikalar və sonda “bu nə idi axı” dedirdəcək qədər zövqsüz dizayn. Uşaq bağçasına uyğun səviyyədə hazırlanmış bu maskot nə böyükləri heyran edir, nə də uşaqları cəlb edir. Əksinə, insanı “nə qədər qənaət ediblərsə, dizaynı süni intellektə elə-belə verib çıxarıblar” düşünməyə vadar edir.

“Qarabağ” Azərbaycanın son illərdəki ən sabit və uğurlu təmsilçisidir. Bunu heç kim inkar etmir. Amma bu uğurların kölgəsində uzun müddətdir hiss olunan bir mənzərə var: qənaət. İstər transfer siyasətində, istər mətbuat xidmətinin fəaliyyətində, istər marketinq işlərində bu yığımcılıq açıq-aşkar hiss olunur. İndi isə bu qənaətə “Kəhər” də qoşuldu.

Beynəlxalq klublar üçün maskot bir simvoldur. Arsenalda “Gunnersaurus”, "Real Madrid"də “Realmadridino” sadəcə kostyum deyil, klub mədəniyyətinin, tarixinin, marketinq hədəfinin bir parçasıdır. “Qarabağ” isə belə bir imkanı əlinin içi ilə itələyib, mövsümlük forma səviyyəsində ucuz bir yamaq əlavə edib. Heç olmasa bu qədər önəmli bir simvol üçün peşəkar dizaynerlərlə işləmək, canlı animasiya elementləri əlavə etmək, sosial mesaj daşıyan bir vizual yaratmaq mümkün deyildimi?

Görünən odur ki, klub yenə ucuzun dalınca qaçıb. Təki gündəmdə qalaq, təki bir “kontentimiz” olsun düşüncəsi ilə. Amma unudurlar ki, “Qarabağ” artıq regional yox, Avropa səviyyəli klubdur. Bu səviyyədə uşaq oyuncağına oxşayan maskot təqdim etmək sadəcə öz brendini aşağılamadır.

Belə yarımçıqçılıq bir klubun timsalında daha çox təəssüf doğurur. Çünki “Qarabağ” kimi bir klubun adını, tarixini, simvolunu bu qədər bəsitləşdirmək nə azarkeşə, nə sponsora, nə də gələcəyə hörmətdir.

Qısası, “Kəhər” bu stadionun simvolu deyil, maskaradır.

Forvard.az