“Məşqlər yaxşı keçdi. Dünya çempionatına iyulun axırı, avqustun əvvəlindən hazırlaşmağa başlamışıq”.

Forvard.az İdman.bizə istinadən xəbər verir ki, minifutbol üzrə Azərbaycanın U-23 millisinin baş məşqçisi Rəcəb Fərəczadə deyib.

O, oktyabrda Xorvatiyada keçiriləcək dünya çempionatına hazırlıqları dəyərləndirib. Sabiq futzalçı bildirib ki, 40-50 futbolçu arasından 20 gün ərzində seçim edib: “Onların içindən 17 nəfər heyətdə yer aldı. Şəffaf bir seçim oldu. Düzdür, bir o qədər də ürəkaçan deyil, amma əlimizdə olan budur. 14 futbolçu və 2 qapıçı ilə mundialda təmsil olunmaq istəyirik”.

Fərəczadə mundialda hədəflərindən də söz açıb: “Rəqiblərimiz sürprizdir. Heç bir yerdən yeni oyunlarını tapıb izləyə bilmədim. İlk matç bir qədər çətin olacaq. Çünki rəqibi oyun əsnasında tanıyacağıq. Federasiya qarşımıza turnirdə layiqincə çıxış etmək məqsədini qoyub. Bizə heç bir təzyiq yoxdur. Birinci hədəfimiz qrupdan çıxmaqdır. Şanslarımızı dəyərləndirsək, onu deyə bilərik ki, təkcə qrupumuzda olan Kolumbiyanın sonuncu dünya çempionu olduğunu bilirəm. Rəqibləri tanımadığımız üçün qəti bir şey demək mümkün deyil. İnformasiya da toplaya bilmirəm. 1 aydır araşdırsam da, bir fayda vermir. Rəqiblərin 2021-ci ildə oynanılan 1-2 oyununa baxa bilmişəm. İndi istər-istəməz o yaş qrupu dəyişib. Ona görə bir az qaranlıq qalır”.

Qeyd edək ki, dünya çempionatı oktyabrın 7-10-da Xorvatiyada təşkil olunacaq.