Azərbaycan idmanında son illər bir sıra sahələrdə yenidən doğuluş yaşanır. Bu doğuluşun parlaq nümunələrindən biri də voleyboldur. Uzun illər durğunluq dövrü keçirmiş bu idman növü hazırda ikinci baharını yaşayır. Və bu canlanmanın arxasında yeni komanda, aydın strategiya və səmimi səy dayanır.

2023-cü ilin sonlarında Azərbaycan Voleybol Federasiyasına (AVF) rəhbər təyin olunan Şahin Bağırovun rəhbərliyi ilə voleybolda tam fərqli ab-hava formalaşıb. Onun gəlişi ilə təkcə idarəçilikdə deyil, həm də idmanın kütləviləşdirilməsində, regionlara yayılmasında və beynəlxalq arenadakı görünürlüyümüzdə ciddi dönüşlər yaşanır. Federasiyanın baş katibi Faiq Orucov da gənc yaşına baxmayaraq, müasir və çevik idarəetmə tərzi ilə bu inkişafın əsas simalarından biridir.

Bir vaxtlar təkcə Bakı ilə məhdudlaşan voleybol indi regionlara doğru genişlənir. Yarışlar artıq bölgələrdə keçirilir, çimərlik voleybolunda Avropa səviyyəsində nailiyyətlər əldə olunub, azyaşlılar və gənclər arasında maraq artır. Bu, planlı və sistemli işin nəticəsidir. Şahin Bağırov və komandasının yanaşması idmanda yalnız nəticə deyil, həm də infrastruktur, təlim-tərbiyə və media əlaqələrinin vacibliyini ortaya qoyur.

Burada xüsusi bir ada ayrıca toxunmaq yerinə düşər: Federasiyanın mətbuat katibi Şəfəq Kərimova. O, sabiq voleybolçu kimi idmanın ruhunu yaxşı anlayır və bu təcrübəsini peşəkar kommunikasiya ilə birləşdirərək federasiya ilə ictimaiyyət arasında möhkəm körpü qurub. Medianın federasiyaya olan marağı, ictimai rəylərin müsbətliyi, informasiya axınının şəffaf və davamlı olması – bütün bunlar onun zəhmətinin nəticəsidir.

Azərbaycan Voleybol Federasiyası artıq təkcə yarış təşkil edən deyil, eyni zamanda bu idman növünü cəmiyyətə sevdirən, yeni nəsli ona bağlayan, beynəlxalq uğurları hədəfləyən bir quruma çevrilib. Qarşıdakı illərdə daha böyük nailiyyətlərin şahidi olacağımıza şübhə yoxdur. Çünki doğru idarəetmə, səmimi niyyət və dayanıqlı strategiya hər zaman uğurun əsas açarlarıdır.

Voleybol Azərbaycanda sadəcə idman növü deyil, artıq bir inkişaf hekayəsidir. Və bu hekayənin ən gözəl fəsilləri hələ qarşıdadır.

Ağa Dadaşzadə
Forvard.az