I Liqaya vəsiqə qazanan “Şimal”da yeni baş məşqçi təyinatı gerçəkləşib. Xaçmaz təmsilçisini gələn mövsümdən Zaur Ramazanov çalışdıracaq. “Xəzər-Lənkəran”ın sabiq üzvü ilə neçə illik müqavilə imzalanıb? Komandanın digər baş məşqçi Rəcəb Mahmudovun taleyi necə olacaq? Xaçmazlıların icraçı direktoru Elxan Yusifli Forvard.az – a açıqlamasında bu suallara aydınlıq gətirib.

“Bildiyiniz kimi I Liqada mübarizə aparmaq üçün fərqli şərtlər var. Lisenziyalaşdırma tələblərindən biri də ən azı B kateqoriyalı məşqçi komandanın sükanı arxasında olmalıdır. Rəcəb Mahmudovun isə həmin kateqoriyası yoxdur. Ona görə də biz B kateqoriyalı məşqçi axtarışına çıxdıq. Sonda Zaur Ramazanovla razılığa gəldik. Onunla 1 illik sözləşmə imzaladıq. Zaur bəy ilə razılığa gəlməyimizdə komandamızın ən təcrübəli futbolçusu və kapitanı Tural Cəlilovun xüsusi rolu oldu. Onlar vaxtilə birgə “Xəzər-Lənkəran”da çıxış ediblər. Odur ki, yeni baş məşqçi semimizdə kapitanımızın rolu böyükdür. Ola bilsin ki, Tural Cəlilov I Liqada artıq oynayan-məşqçi yox, köməkçi məşqçi kimi çalışsın. Rəcəb Mahmudov isə növbəti mövsümdə yeni yaradılacaq U-15 komandamızın həm rəhbəri, həm də baş məşqşçisi olacaq”.

Xaçmaz təmsilçisində qapıçılarla işləyən qadın məşqçi də olacaq. Klub rəsmisi bu barədə də məlumat bildirdi.

“I Liqa tələblərindən biri də komandada qapıçılarla işləyən məşqçinin olmasıdır. Bu posta isə xanım məşqçi namizəd üzərində dayandıq. Gələn mövsümdən Zülfiyyə Bayramova qapıçı məşqçisi kimi bizimlə olacaq. O, AFFA-ın qapıçı məşqçi kursunu uğurla keçib. Zülfiyyə xanım həmçinin “Baku Juniors Sport Club”da qolkiper kimi çıxış edir”.

ABDULLA İSMAYILOĞLU