Hazırda yaxşı günlərini yaşamayan “Sumqayıt” klubunda problemlər bir-birini əvəz edir.

Forvard.az-ın əldə etdiyi məlumata görə, turnir cədvəlində 29 xalla səkkizinci pillədə qərarlaşan komandanın baş məşqçisi Vaqif Cavadovun bəzi yerli futbolçularla münasibətlərində gərginlik yaşanır. Bildirilir ki, gənc çalışdırıcı yarımmüdafiəçi Rövlan Muradov, hücumçu Kamran Quliyev və qapıçı Rəşad Əzizli ilə prinsip məsələsi yaşayır.

Klubun mətbuat katibi Zaur Xudiyev Forvard.az-a açıqlamasında bu iddiaları təkzib edib:

“Vaqif Cavadovun heç bir futbolçu ilə şəxsi prinsipi yoxdur. Rövlan Muradovun şansını gözləməyini baş məşqçi vurğulayıb. Son görüşdə isə o, yenidən meydana çıxdı. Kamran Quliyev barədə danışsaq, yeni futbolçuların komandaya qoşulmasından sonra baş məşqçi onun çıxışından razı qalmayıb. Qapı xəttində isə Cavadov hazırda iki qapıçı arasında seçim edir.”

Amma klub daxilindən aldığımız məlumata əsasən, Rəşad Əzizli məşqlərdə ən çox seçilən və özünü göstərən əsas qapıçılardan biridir. Bu məsələ ilə bağlı Zaur Xudiyev belə cavab verib:

“Bizim məşqlərə əvəzedici heyətdən də qapıçılar qoşulur. Ümumilikdə 4-5 qapıçı iştirak edir. Amma Rəşadın şans qazanmaması prinsip məsələsi ilə bağlı deyil.”

P.S. Təcrübəli, potensiallı və zədəsi olmayan futbolçular hansı səbəbdən ehtiyatda qalır? Bu suala yalnız baş məşqçi Vaqif Cavadov aydın cavab verə bilər. Lakin Azərbaycan futbolunun inkişafını istəyiriksə, yerli futbolçularımıza dəyər verməliyik. Görünür, Vaqif Cavadov özünün neçə yaşında futboldan uzaq qaldığını artıq unudub...

Ağa Dadaşzadə