II Liqada mübarizə aparan “Şahdağ Qusar” mövsümdə məğlub olmayan turnir cədvəlində vahid liderliyini davam etdirən komandadır.Şimal bölgəmizin təmsilçisi XXI turdan sonra 61 xalla sahibdir. Komanda I Liqaya vəsiqəni təmin etsə də, çempionluğunu rəsmləşdirməyib. Qusarlıların baş məşqçisi Elnur Abdullayev qarşıdakı hədəflərlə bağlı Forvard.az – a danışdı.

“XXI turdan sonra statistikaya nəzər yetirsək, 20 qələbə və bir heç-heçəyə nail olmuşuq. Bu yaxşı göstəricidir. Qarşımıza qoyulan hədəflərin birinə çatmışıq. Şükürlər olsun ki, I Liqaya vəsiqəni təmin etdik. Bu münasibətlə həm futbolçularımızı, həm azarkeşlərimizi, həm də Qusar camaatını təbrik edirəm. Amma işimiz bitməyib, qızıl medalları da qazanmaq istəyirik.Hazırda əsas motivasiyamız budur. Çoxları qeyd edir ki, bizə əsas çətinliyi “Şəfa” yaradır. Amma bu belə deyil. Mən tək “Şəfa”nı yox, bütün rəqiblərimizi ciddi hesab edirəm. Bütün klublar bizə qarşı fərqli motivasiya ilə oynayır, bu da bizim işimizi çətinə salır. Zatən, çempionatın II yarısında heç bir oyunumuz asan keçməyib. Qarşıdakı iki turda bizi “Ağdaş”, sonra “Füzuli”, ardıncada “Şəfa” ilə oyunlar gözləyir. İlk iki rəqiblərimiz autsayderlər zonasında olsa da, belə komandalara qarşı oynamaq və futbolçuları motivasiya etmək çox çətindir. Odur ki, “Ağdaş” ilə “Füzuli” sədlərini uğurla keçdikdən sonra “Şəfa” ilə qarşıdurmanı düşünə bilərik. Xülasə, bizim üçün gərgin mübarizə sonuncu tura kimi davam edəcək”.

ABDULLA İSMAYILOĞLU