Ürəyim ağrıyır "Neftçi"yə, söz tapa bilmirəm. Baş məşqçi Samir Abbasovu tanıyıram, yaxşı məşqçidir, onunla çempion olmuşuq.

Bu sözləri Forvard.az-a açıqlamasında Xalq yazıçısı və "Neftçi"nin sabiq müşahidə şurasının sədri Çingiz Abdullayev Azərbaycan Premyer Liqasında 30-cu turda "ağ-qaralar"ın 2:0 öndə olduğu zaman 2:4 hesablı məğlubiyyəti haqda danışarkən deyib:

“Mən fəxr edirəm ki, "Neftçi" uzun zaman sonra mənim vaxtımda çempion olub. 3 dəfə də gümüş medallara sahib olmuşuq. Ancaq bu gün komandaya baxıram ürəyim ağrıyır, söz tapa bilmirəm. Belə də uduzmaq xoş deyil, hətta insanlar deyir ki, belə oyundansa gərək ilk hissədən sonra meydana çıxmazdınız. Gülməli də olsa belə deyirlər. "Neftçi"nin mənim həyatımda özəl yeri var, sona qədər də mənim həyatımın önəmli dəyərlərindən biri olacaq. Mən bu komandanı sevmişəm, sevəcəm də, harda olsam bilin ki, "Neftçi" mənim qəlbimdədir”.

Ç.Abdullayev komandanın böyük ölçüdə çempionatda medal şanslarının itirməsinə görə, onu yeniden rəhbər postuna səsləyən azarkeşlərin və idman ictimaiyyətinin nümayəndələrinin fikirlərinə belə cavab verdi:

“Mənə yenidən belə bir dəvət olsa qaça-qaça gələrəm, ona görə ki, biz bu komanda üçün canımızı qoymuşuq. Siz bəlkə də bilmirsiniz, mən, Fərhad Bədəlbəyli, Mehdi Nəcəfov, Zaur Qəhrəmanov, Səməd Qurbanov hər oyundan sonra yığışıb müzakirələr aparırdıq, məğlubiyyət olanda özümüzə yer tapa bilmirdik. "Neftçi" ilə mənəvi olaraq indi də belə yaşayırıq. Bizim dövrdə işlərimizin çoxluğu, gərgin rejimə rəğmən heç birimiz "Neftçi"ni 1 saniyə belə diqqətdən kənarda qoymamışıq. Bu bizim həyatımız olub, belə də olacaq. Xaricdə olsam belə, mən "Neftçi"nin bütün oyunlarını izləyirəm, həmişə dəstəkləyirəm, həmişə də azarkeşi olacam. Rəhbər kimi də geri dönsəm tam məsuliyyətlə çalışıb komandanı ən yaxşı yerlerə gətirəcəyəm. Ancaq bu gün komandanı kimlər idarə edirsə gərək işə daha məsuliyyətli, daha ciddi yanaşsınlar. Düşünsünlər ki, necə olub 2 ildən çoxdur yoxuq, amma komanda ciddi bir uğura nail ola bilmir. Bu məni çox təəssüfləndirir”.

Sabiq rəhbər hazırkı rəhbərlik sizi oyunlara dəvət edirmi sualına belə cavab verdi:

“Onlar tərəfindən bir dəfə də zəng olmayıb, məni qonaq tribunasına dəvət etməyib. Heç bir dəfə də...”

Ağa Dadaşzadə