Rəşad Sadıqovun yetirmələri ilə öz meydanında qarşılaşan Samir Abbasovun “Neftçi”si azarkeşlərinə sözün əsl mənasında şok yaşatdı. Oyunun birinci hissəsində rahatlıqla rəqibinin qapısının 2 top keçirən “flaqman” özü də rahatlamağa başladı. Nəticədə hələ birinci hissədə döyüşçü rəqibi – “Zirə” hələ sevinmək üçün tez olduğunu "Neftçi”yə xatırlatdı. Və əlbəttə ki, bu özünü oyunun nəticəsində də göstərdi - 2:4.

Samir Abbasovun yetirmələrinin sevinci elə bir hissə çəkdi. Hətta bir çoxları düşünürdü ki, “Zirə” oyunu rahat keçirəcək və güc sərf etmədən məğlubiyyətlə razılaşa bilər. Çünki qarşılaşma elə başlamışdı ki, artıq oyunun taleyi haqqında danışanlar bunu Rəşad Sadıqovun hocasına bir növ jesti kimi də qiymətləndirirdilər. Çünki “Zirə”nin məğlubiyyəti “Qarabağ”ın çempionluğunu vaxtından tez rəsmiləşdirmiş olurdu. Sadıqov isə sonacan döyüşdü və qaragün “Neftçi”yə heç bir şans verilmədi.

Samir Abbasov oyundan sonra açıqlamasında onsuz da Premyer Liqadan əli üzülən “flaqman”nın hədəfinin kubok olduğunu bəyan edərək həm azarkeşləri sakitləşdirir, həm də özünə və komandasına təsəlli verirdi. “Kubok matçına karyeramızdakı son oyun kimi çıxmalıyıq” – Abbasov məhz bu cümlə ilə hamıya göstərmək istəyir ki, əlindən gələni edib çempion olacaqlar. “Əksi olacaqsa, getməyə hazıram” demək istəyir. Görək, “Neftçi” doğrudanda kubok qazana biləcəkmi və bununla günahlarını bir növ yumağa müvəffəq olacaqmı?!

Azarkeşlər üçün “flaqman”ın işi hər oyun qələbə qazanmaq uğrunda savaşan komanda görməkdir. Çünki onlar Azərbaycanın tarixi klubuna fanatlıq edirlər, çünki yüzlərlə futbolçu “Neftçi” eşqi ilə futbolçu karyerasına başlayaraq xəyallarının arxasınca gedib. İndi isə…

“Flaqman” artıq turnir cədvəlində 6-cı yerdədir. Bəlkə də, futbola baxmayan birinə qəfil sual versən ki, “səncə, “Neftçi” Azərbaycan çempionatında neçənci yerdədir?” qayıdıb deyər ki, “başqası var ki, bir “Neftçi”dir, bir “Qarabağ”. “Qarabağ” da son illər avrokuboklarla daha çox tanındı…

Azərbaycan futbolunun “flaqman”ı bu vəziyyətdə olmalı deyil! Günahdır! Məhz Azərbaycan futbolu adına fövqəladə vəziyyətdir! Azərbaycan futbol tarixi qarşısında məsuliyyətdir!

Ağa Dadaşzadə
Forvard.az