“Qarabağ” XXX turda “Səbail”in qonağı oldu. Görüş ağdamlıların 4:1 hesablı qələbəsiylə başa çatdı. “Süvarilər”in kapitanı Bədavi Hüseynov Forvard.az –a həm “dənizçilər” üzərində qələbə, həm də Maksim Medvedevin Azərbaycan yığmasında qruplaşma olub fikirlərinə aydınlıq gətirdi.

- “Səbail” üzərində böyükhesablı qələbə qazandız, matçla bağlı fikirlərin maraqlıdır...

- Yaxşı oyun keçirdik. “Səbail” sonuncu pillədə qərarlaşsa da, həm topu özündə saxlamaqda, həm hücuma yaxşı qoşula bilirlər. Onlara da vacib xal lazım olduğunu bilirdik və meydanda gərgin mübarizə gedəcəyi bəlli idi. Rəqibi yaxşı zərərsizləşdirdik. Görüşdə istədiyimizi həyata keçirdik. Düşünürəm ki, hesab sərgilədiyimi oyuna uyğun oldu.

- “Dənizçilər”lə görüşdə şans qazanmadın zədən var yoxsa baş məşqçi sənə istirahət vermişdi?

- Heç bir zədəm yoxdur, baş məşqçimizin qərarıdır. Bizi qarşıda çətin oyunlar gözləyir, ona görə də Qurban müəllim tez-tez rotasiyalar edir və hər bir futbolçuya oynamaq şansı verir.

- Bir-iki qələbə qazansaz erkən çempionluğunuzu rəsmləşdirəcəksiz. Səncə bu mövsüm qızıl medallara sahib olmaq sizə çox asan başa gəlmədi?

- Belə deməzdim. Hər bir mövsümün özünə görə çətinliyi olur. Sadəcə biz hər oyunda, hər turda performansımızın aşağı düşməsinə imkan vermirik və daha çox tərəqqi etməyə çalışırıq. Baş məşqçimizdə daim inkişaf etməyimizi bizə izah və tələb edir.

- Sabiq komanda yoldaşın Maksim Medvedev bu yaxınlarda açıqlamasında bildirdi ki, yığmada həmişə qruplaşma olub. Hazırda ölkənin əsas komandasının kapitanı kimi bu barədə nə deyərdin?

- Məncə, Maksimin fikirlərini çoxları düz başa düşməyib. Qruplaşma deyəndə o, heç də bölücülüyü nəzərdə tutmayıb. Sadəcə milliyə birgə gələn və mehriban olan futbolçuları nəzərdə tutub. Biz hamımız azərbaycanlıyıq və birlikdə oynayırıq. Mən bu vaxta kimi qruplaşmalara rast gəlməmişəm. Belə hal olarsa, dərhal reaksiya verib qarşısını alarıq və komandanın bölünməsinə imkan vermərik.

- Bəs Maksim sən ilə Ramil Şeydayevin adını niyə birgə çəkib?

- Yenə deyirəm, millidə qruplaşma yoxdur, buna imkan da vermərik. Sadəcə “Qarabağ” futbolçuları yığmaya gəlirsə, birlikdə ünsiyyət qurur, süfrə arxasında da həmrəylik göstərirlər. Bunu digər klublardan gələn futbolçular da edir. Qısası, bu sadəcə klub yoldaşlığından doğan mehribanlıqdır, qruplaşmaya aidiyyatı yoxdur.

- Ölkənin futbol ictimaiyyəti birmənalı olaraq qeyd edir ki, Rəşad Sadıqovdan sonra Azərbaycan seçməsində meydanda dominantlıq edən kapitan futbolçu yoxdur. Bu yanaşma ilə razısanmı?

- Təbii ki, Rəşad kimi futbolçu olmaq, onun liderlik keyfiyyətinə sahiblənmək çətindir. Bizlər ondan çox şey öyrənmişik. Əlbəttə ki, hazırda yığmamızda problemlər çoxdur, amma bunu sırf lider-kapitan ağırlığının olmamasına bağlamazdım. İndi millimizdə cavanlaşma prossesi gedir, mən daxil bütün təcrübəlilər onlara yol göstərir, köməkliyimizi əsirgəmirik. Eləcə də oyunumuza təsir edəcək başqa faktorlar var. Buna rəğmən biz ümidliyik ki, nəicələrimiz yaxşılaşacaq. Bizə müəyyən vaxt lazımdır.

ABDULLA İSMAYILOĞLU