Forvard.az "Qarabağ"da yaşanan maaş problemini gündəmə gətirdikdən sonra görünür, kimlərinsə yuxusu ərşə çəkilib. İş orasıdır ki, təkcə bu məlumat narahatlığa səbəb olmayıb.

Bundan öncə "atlılar"ın transfer etməyəcəyi, "köhnə hamam, köhnə tas" prinsipi əsasında fəaliyyətlərini davam etdirəcəyini yazmışdıq. Lakin çox keçmədi ki, "Qarabağ"ın köklü dəyişikliklərə gedəcəyini əks etdirən informasiyalar tirajlandı. Cəmi iki saat sonra bu xəbərin ortaya çıxmasına təsadüf deyə bilərdik. Yaxud da klubun böhran komandasının təxirəsalınmaz əməliyyatı kimi dəyərləndirmək olardı.

Amma və lakin. İlk cümlədəki mövzuya gəldikdə isə məsələ belədir: reytinqli idman səhifələrindən biri Forvard.az-ın xəbərinə istinad edir, ardınca çox keçmir ki, paylaşılan post silinir. Silinməkdə də problem olmaya bilər. Hər media qurumunun xəbər siyasəti var və hələlik "Qarabağ" az qala "toxunulmaz" olduğundan belə bir addım atıla bilər. Eybi yox, olsun, çox keçməz klubun fəaliyyəti çəkinmədən tənqid olunmağa başlayacaq. Çünki avrokuboklarda Qurban Qurbanovun komandasının son zamanlar yaxşı nəticə göstərə bilməməsi, artıq bir çoxlarının məyusluğundan doğan tənqidi yanaşmalarına səbəb olub. Əsassızdırmı? Xeyr! Qərəzlidirlərmi? Xeyr!

Axı Azərbaycan futbolunu izləməyənlər belə, "Qarabağ"ın uğurlarına görə komandaya azarkeşlik etmək üçün stadiona gəlirlər. Bu gün-sabah "atlılar" onları da itirəcək. Klubun keçmiş sözçüsü Gündüz Abbaszadənin sözləri yada düşür. İndi "Qarabağ" yaxşı nəticələr göstərdiyi üçün problemlərdən danışılmır.

İndi hocanın komandası tənqidlərdən nəticə çıxarmaq əvəzinə tənqidləri boğmaqmı istəyir? Əlbəttə, buna inanmaq istəmirik. İstəyimiz budur ki, "Qarabağ" haqqında danışılan məsələlərdən nəticə çıxarsın.

Uğurlarını bölüşdüyümüz kimi, yanlış hesab etdiyimiz addımlarını da paylaşmaq bizim haqqımızdır. Odur ki, hamı üzərinə düşən işi layiqincə yerinə yetirməlidir, yaxud da ən azından buna cəhd etməlidir.

Arzu edirik ki, yenidən "atlılar"ın uğurlarından yazaq, nəinki problemlərindən.
Qurban Qurbanovun sevinc göz yaşları üçün darıxmışıq...

Ağa Dadaşzadə
Forvard.az