Son zamanlar "Qarabağ" klubundakı problemlər, artıq gizli qalmır. Artıq klub işıqlandırılması qadağan olan məsələlərin qarşısını ala bilmir. Hazırkı vəziyyətin qarışıq olduğunu görən futbolçular özlərinə kənarda həmsöhbət axtarırlar. Yeni strategiyaya əsasən yerli futbolçuların maaşları ötən mövsümlə müqayisədə hətta 50 faiz azaldılacaq. Onların əvəzinə yüksək ödənişlər legionerlərə veriləcək. Bu strategiyanın ilk "qurbanı" Bəhlul Mustafazadədir. Onsuz da onun performansı aşağı səviyyədədir, məşqçilər korpusu onun oyunundan narazıdır. Amma onun timsalında bütün yerli futbolçulara bildirilib ki, maaşlar ciddi şəkildə azalacaq. Oynamaq istəyən az maaşla ehtiyatda əyləşib şans gözləyə bilər.

Digər tərəfdən legionerlər üçün maaş məsələsi həll olunub, ancaq transferlər üçün ayrılan pullar necə olacaq? Təbii ki, klub yenə xəsislik edib. Ciddi məbləğ ayrılmayıb, klub prezidentinə yalan vədlər verilib ki, ciddi transfer çalışmalarına start verilib. Ancaq yenə də Qurbanov samanlıqda iynə tapan kimi, qəpik-quruşa keyfiyyətli futbolçu axtarmağa çalışacaq. Ancaq vaxt o vaxt deyil, avrokubokdakı növbəti uğursuzluqda gözləmədiyiniz insan hədəf kimi göstəriləcək. Kresloda əyləşənlər kreslolarından möhkəm yapışıb.

Vəziyyət çox qarışıqdır, klubun uğurlar fonunda görünmədiyi bütün problemlər ay kimi hər kəsə məlum olacaq.

Kluba yaxın mətbu orqanları isə komandada köklü dəyişikliklərin olacağını deyir. Lakin yayılan informasiyalar, "Qarabağ"ın əvvəlki kimi performans sərgiləyə bilməməsi, hətta Qurbanovun artıq əsəblərini cilovlaya bilməyib planşetə təpik vurması, əslində, çox nüanslardan xəbər verir. Görünən kəndə nə bələdçi...

Ağa Dadaşzadə
Forvard.az