Azərbaycan kubokunun yarımfinal mərhələsinin “Neftçi” və “Sabah” komandaları arasında keçirilən ilk oyunundan sonra xoşagəlməz hal yaşanıb.

Futbolxeber.azsaytına etibarlı mənbədən verilən məlumata görə, matç başa çatdıqdan sonra “Sabah”ın prezidenti, AFFA İcraiyyə Komitəsinin üzvü Maqsud Adıgözəlov görüşün baş hakimi Əliyar Ağayevi hədələyib.

Xatırladaq ki, sözügedən oyunun əsas vaxtına əlavə edilmiş 1-ci dəqiqədə meydan sahiblərinin müdafiəçisi Yuri Matias rəqib hücumçu Coy-Lens Mikelsə qarşı cərimə meydançasında kobudluq edib. Lakin həmin epizodda baş hakim Əliyar Ağayev penalti təyin etməyib. Bir tərəfdən referi epizodu gözdən qaçırıb. Digər yandan da, VAR hakimi Rauf Allahverdiyev və AVAR hakimi Kamran Bayramovun epizoda reaksiya verməyə gecikmələri buna səbəb olub.

İnsident də məhz bundan sonra yaşanıb. Qələbəyə baxmayaraq, penalti epizodundan narazı qalan “Sabah”ın prezidenti Maqsud Adıgözəlov matçdan sonra Əliyar Ağayevin üzərinə gedərək hər kəsin gözü qarşısında onu rahat şəkildə təhdid edib. Adıgözəlov FİFA referisini hakimlikdən uzaqlaşdıracağı ilə hədələyib.

Təbii ki, bu, yolverilməz haldır. M.Adıgözəlov klub rəhbəri, yaxud AFFA İcraiyyə Komitəsinin üzvü olsa da, bu, ona hakimləri hədələmək ixtiyarı vermir. İstər cari, istərsə də əvvəlki mövsümlərdə “Sabah”ın da lehinə kifayət qədər hakim səhvləri olub. Çox uzağa getməyək, elə bu mövsüm “Turan Tovuz”la (2:1) görüşü yada salmaq kifayət edər. Odur ki, hər hansı səhvə görə hakimin, özü də Əliyar Ağayev kimi Azərbaycanı beynəlxalq arenada təmsil edən FİFA referisinin üzərinə getmək, onu təhdid etmək heç bir məntiqə sığmır.