Zahirən gözəl görüntüdür, hətta möhtəşəm də demək olar. Əksər futbolsevərlərin dediyi kimi, başqa ölkələrdə məşqçilər bir-birinə atmacalar edir, əl-qol atır, bizdə isə sülh və idmana yaraşan mənzərə. Təkcə zahirən deməklə də kifayətlənmək ola bilsin ki, ədalətsizlik sayılar, şübhə yoxdur ki, hər iki mütəxəssis daxilən də bir-birlərini böyük rəğbət, hörmət bəsləyirlər.

Rəşad Sadıqov və Qurban Qurbanovu ət və dırnağa bənzətmək olar. İstər millidə, istərsə də klubda komanda uğrunda birgə savaşıblar. Bununla bağlı çox danışmaq mümkündür.

Deyəcəksiniz ki, hə də, bəs sözünün Mustafası nədir?

Yuxarıdakıları qeyd etməsəm, qərəzli olduğumuz düşünülər. Sanki belə görüntülər bizi qıcıqlandırır. Əsla!

Görüntülər adama müsbət enerji verdikdə, bir anlıq Azərbaycan çempionatı haqda aydın təsəvvür formalaşır. Bəlkə də aydın olmayan.

"Qarabağ" və "Zirə" turnir cədvəlində 1-ci və 2-ci yeri bölüşürlər. Çox güman ki, belə də sonlanacaq. Qurban Qurbanov və onun parlaq komandasının nümayəndəsi, bəlkə də, özünün davamçısı ondan bir pillə aşağıda hocasını izləyir. Yəni Azərbaycan çempionatında yenilik yoxdur, obrazlı desək, 1-ci və 2-ci yer elə "atlılar"a məxsusdur. Rəqabət isə şəkildə gördüyünüz kimidir qol-qola, çiyin-çiyinə...

Doğrudan da Azərbaycan futbolunu bu iki mütəxəssis, azarkeşlər üçün sevimli olan bu iki nəfər düzəldəcəksə, elə həmişə bir-birinin yanında sıx, möhkəm dayanmağı arzulayırıq. Yoxsa çətin futbolumuz üzümüzü güldürsün, sevindirsin.

Qurban Qurbanova deyək ki, "Qarabağ"dan bir nəfəri də məzun edib hansısa komandanın başına keçirməyə müvəffəq olsun ki, ilk 3 yeri tuta bilsinlər və belə ardıcıllıqla ağ günə çıxaq. Yaxud da Rəşad Sadıqov hocası kimi miras qoya bilsin.

Əgər rəqabət doğrudan da sağlam və xoş mənzərəli olacaqsa, sayınız artsın, yanınızda özünüz kimi insanlar bol olsun. İstəyimiz futbol görməkdir, maraqlı mübarizə izləməkdir.

Ağa Dadaşzadə
Forvard.az