Bu gün yerli mətbuatda "Tanınmış azərbaycanlı idmançı özünə təmtəraqlı ad günü doğum günü keçirdi" başlığı diqqətimi çəkdi. Xəbəri açdım və təmtəraq axtarsam da, tapa bilmədim. Mətbuat olaraq baxış sayı toplamaq üçün belə başlıqlar işlək metoddur. Amma yaxın günlərdə Avropa çempionatına hazırlaşdığını qeyd etmək və ardınca "əyləncəyə də vaxt ayırır" yazmaq bir qədər qərəzli görüntü yaradır. Çünki Hidayət Heydərov doğum günü üçün cəmi bir masa ayırıb və yaxınları ilə birgə qeyd edir. Ən azından görüntülərdə təmtəraq yoxdur.

Hazırda az qala bütün ortastatistik azərbaycanlılar doğum günlərini artıq restoranda keçirməyə üstünlük verir. Bunu "təmtəraq" adlandırmaq ardınca isə əyləncəyə eyham vurmaq qərəzli görünmürsə, bizi bağışlayın. Bizim qüsurumuzdur. Lakin belə bir uğurlu idmançımızın xoş gününü şokvari təqdim eləmək düşündürücüdür. "Hidayət Heydərov xoş gününü belə qeyd etdi", "Məşhur çempionumuz sevdiklərini əlamətdar günda başına yığdı" və s. o qədər pozitiv yönümlü başlıq seçmək olar ki...

Allah eləməmiş, sabah idmançımızı oxşar xəbərlərlə küsdürə bilərik. Federasiya axtarıb, arayıb idmançı tapıb, üzərində işləyib, heyif olar. Burada artıq hamımız uduzmuş olarıq.

Yeri gəlmişkən, Cüdo Federasiyası işlərində davamlılığı qorusa - hərçənd buna şübhəmiz yoxdur, çünki yaxşı sürət götürüb - belə ortaya çıxardığı idmançıları haqda yaxşı mənada maraqlı və diqqətçəkən xəbərlər yazmaq olacaq...

Ağa Dadaşzadə
Forvard.az