Azərbaycan futbolçusunun yerli azarkeşlərə “susun” deməsi qədər absurd nə ola bilər axı? Təsəvvür edin, elə bir futbolu olan ölkənin top qovanısan ki, indiyə qədər biabırçı nəticələrin ard-arda düzülür. Hər oyun “məmə” deyəndən “pəpə” deyənə qədər dişinin dibindən çıxanı futbolçulara deyir. Nə qədər xarici mütəxəssis gəldi, illər keçdi, AFFA rəhbərləri dəyişdi, amma nəticələr eynidir. Çünki Azərbaycan futbolunda belə “sus” göstərəcək qafaya sahib olan şəxslər var.
A kişi, kimə sus deyirsən? Səni qəhrəmana çevirən millətinə? Yoxsa səni tənqid edənlərə? Axı sən nə etdiyinin fərqindəsənmi? Sən elə bilirsən “Qarabağ”la hansısa yarım-yapalaq nəticə əldə etməklə beton tökmüsən? “Qarabağ”ın uğurları Azərbaycan futbolu ilə müqayisədə uğurdur. Lap əvvələ bunu yaz, Nəriman Axundzadə! Üstəlik, sənə güvənən, səni azarkeşlərə sevməyə rəvac verən hocandan az da olsa, nəsə öyrənməyində fayda var. Axı az qala bütün günü görürsən. Ay Nəriman kişi, beyninin bir küncündə yuxarılarda sancaqla ki, Azərbaycan çempionatında qol vurmusan. Azarkeş üzünə həsrət qalan, insanların futbol haqqında xəyallarını puç edən futbolumuzun nümayəndəsisən. Sənin heç qol vuranda canfəşanlıq etməyə haqqın yoxdur!
Azarkeşlərini ürək xəstəsi edən Azərbaycan futbolunun top qovanları aldığı o boyda maaşın bir hissəsini hər ay kənara ayırmalıdırlar. Nəyə bilirsənmi, ay Nəriman? Əhalinin müalicəsinə. Absurd gələ bilər, elə sənin “sus” deməyin qədər absurddur. Ayıbdır, futbolçu daxilən böyüməlidir ki, zahirdə özünü göstərsin. Günah səndə deyil, ay Nəriman, günah “sus” dediklərinin 2 dəqiqədə səni qəhrəman elan etməklərindədir.
Onsuz da insanları peşman edə-edə gedirsiniz, bu da dərs olsun, dərs olsun ki, gələn dəfə sən və sənin kimilərə dəstək göstərməsinlər. Komandanın, yaxud Azərbaycanın uğuru kimi hansısa qola sevinsin, keçsin. Elə ona görə sənin adın Avropa klubu ilə yan-yanaa gələndə bunu ələ salanlar tapılır. Bilirlər ki, belə “sus” deyəcək beynin sahibi ya oralara gedə bilməyəcək, ya gedib tezliklə geri dönəcək. Yaxşısı budur bir də özünü biabır etmə, “sus”, ay Nəriman, “sus”...

Ağa Dadaşzadə
Forvard.az