Sanki Azərbaycan millisi meydana məğlub olmağa çıxmışdı, qələbə qazanmağa yox.

"Forvard.az-in məlumatına görə, bunu Azərbaycan millisinin baş məşqçisi Fernandu Santuş Haiti yığmasına qarşı keçirilən yoxlama oyunundan sonra mətbuat konfransında deyib.

70 yaşlı mütəxəssis məğlub olduqları matç barədə danışıb:

"Belə hesabla uduzacağımızı bilsəydim, start heyətini başqa cür qurardım. Məşq prosesində hər şey qaydasında idi. Komanda oyuna çox yaxşı hazırlaşmışdı. İkinci hissədə meydana hücumameyilli futbolçular buraxdıq. Hesabı xeyrimizə dəyişmək istəyirdik.

Fasilədən sonra meydanda bərabər səviyyəli oyun gedirdi. Lakin ikinci qolu buraxdıqdan sonra ruh düşkünlüyü yaşandı".

O, 84-cü dəqiqədə qırmızı vərəqə alan Elvin Cəfərquliyevin davranışının doğru olmadığını bildirib:

"Elvinlə söhbət apardım. Dedim ki, yersiz yerə qırmızı vərəqə almaq olmaz. Lakin bir səhvə görə, futbolçunu qınaq atəşinə tuta bilmərik"

F.Santuş yığmanın heyətində təcrübəli futbolçulara ehtiyac olduğunu söyləyib:

"Bədavi Hüseynov və Şahruddin Məhəmmədəliyev təcrübəli oyunçulardır. Təbii ki, gələcəyin komandasını qurmağa çalışırıq. Bunu edərkən bəzi təcrübəli futbolçulara da şans verilməlidir ki, gənclərə örnək olsunlar. Bu praktika dünya futbolunda da var. Portuqaliya millisinin üzvü Pepe 40 yaşına qədər milliyə dəvət alırdı".

Baş məşqçi Belarusla keçirikəcək yoxlama oyununda müəyyən dəyişikliklər edəcəyini vurğulayıb:

"Əgər nəticə istədiyimiz kimi olsa, oyunun gedişində Şahin Şahniyarova şans verə bilərik. O, çox istedadlı futbolçudur. Ümumiyyətlə hər bir futbolçunun xidmətindən yararlanmaq istəyirik".

Qeyd edək ki, Mehdi Hüseynzadə adına Sumqayıt şəhər stadionunda baş tutan Azərbaycan – Haiti görüşü qonaqların 3:0 hesablı qələbəsi ilə yekunlaşıb.