Azərbaycan seçməsinin yoldaşlıq oyunları ilə əlaqədar çempionatlarımızda fasilə yaranıb. I Liqada mükafatçılar sırasında yer almağa çalışan “İmişli” də yaranan fasilədən maksimum istifadə etməkdə maraqlıdır. Bəs İmişli təmsilçisində hazırda abu-hava necədir? Forvard.az olaraq bu sualı aydınlaşdırmaq üçün komandanın baş məşqçisi Fərid Namazovdan reaksiya aldıq.

“Yığmamızın yoldaşlıq oyunları ilə bağlı yaranan fasilə yerinə düşdü. Bəzi çatışmazlıqlarımız var ki, onları aradan qaldırmağa çalışırıq. Belə ki, əsas heyət üzvlərimizdən Həzrət İsayev ilə Abbas Ağazadə xeyli vaxtdır sıradan çıxıb. Onlar zədədən əziyyət çəkirlər. Bundan başqa XVII turda “Mingəçevir” ilə qarşılaşmada da 5 futbolçumuz cəzalı duruma düşdü. Onlardan Gilyerme Souza ilə Rəhim Cəfərli qırmızı vərəqə aldılar, daha 3 oyunçumuz isə sarı vərəqə limitinə görə kənarda qaldılar. “Sportinq Baku” ilə matçda itkilərlə çıxsaq da, şans verdiyim digər futbolçularım da işlərinin öhtəsindən gəlməyə çalışdılar. “İşıqçılar”la oyuna qədər ardıcıl iki tur idi qələbə qazanırdıq. Mingəçevirlilərlə qarşılaşmada hakimlərin qeyri-adekvat qərarlarına məruz qaldıq. Referilərin qərəzli idarəçilikləri ilə bağlı klub olaraq federasiyaya etirazımızı bildirmişik. Təbii ki, məqsədimiz hər oyunda qalib gəlməkdir. Son iki turda xal itirmək istəməzdik. Hakim qərəzliliyini çıxsaq, çempionatın ikinci dövrəsinə bütün komandalar yaxşı hazırlaşıb. Həm yuxarı pillələrdə, həm də aşağı yerlərdə qərarlaşan komandalar arasında qızğın mübarizə gedir. Hər tur gərgin keçir. İstənilən halda biz nə mübarizədən qopmaq, nə də panikaya düşmək fikirindəyik. Qarşıdan daha ağır III dövrə gəlir və bu mərhələdə hər turda maksimum nəticə qazanmağa fokuslanmışıq”.

ABDULLA İSMAYILOĞLU