Avropa Olimpiya Komitələri (EOC) 2027-ci il Avropa Oyunlarının İstanbulda keçirilməsi ilə bağlı müqavilə imzaladıqdan sonra multiforumun proqramına dair müzakirələr başlayıb. Rəsmi təsdiqlənməsinə hələ aylar qalsa da, 2023-cü ildə Krakovda keçirilən Oyunlarla müqayisədə növlər siyahısında ciddi dəyişikliklərin olacağını əminliklə söyləmək mümkündür.

İdman.biz xəbər verir ki, artıq razılaşdırılan ilkin siyahıda 21 idman növü yer alıb.

Onların arasında əvvəlki multiforumda kənarda qalan güləş və gimnastika da var. Əvvəllər Avropa Oyunlarında olmayan ağır atletikanın da siyahıda yer alması diqqəti çəkir.

İlkin yarış proqramına həmçinin cüdo, taekvondo, boks, atıcılıq, karate, atletika, qılıncoynatma, badminton, kamandan oxatma, voleybol, 3x3 basketbol, ​​triatlon, müasir beşnövçülük, üzgüçülük, avarçəkmə və stolüstü tennis daxildir. İki alternativ idman növü də var: sahilyanı avarçəkmə və yelkən idmanı.

Amma əslində növlər daha çox olacaq. Məsələn, Bakıda və Minskdə keçirilən Avropa Oyunlarının gimnastika proqramına bədii və idman gimnastikasından tutmuş batutla tullanma, akrobatika və aerobikaya kimi bütün növlər daxil idi.

Yəqin ki, Avropa Oyunlarında bir sıra idman növlərində, boksda olduğu kimi, qarşıdan gələn Olimpiadaya lisenziyalar veriləcək. Bəzi növlərdə, o cümlədən cüdoda idmançılar Los-Ancelesə getmək üçün təsnifat xalları qazanacaqlar. Amma bu barədə daha sonra, Yay Oyunlarının idman növləri üzrə seçim sistemi məlum olanda ətraflı danışa bilərik.

EOC rəhbəri Spiros Kapralosun qeyd etdiyi kimi, təşkilatçılar Avropa Oyunları ərəfəsində yeni arenalar tikməyi planlaşdırmırlar: “Türkiyənin sanballı tədbirlərin təşkili ilə bağlı zəngin tarixi var. İstanbul Avropanın ən yaxşı idmançılarını qəbul etməyə hazırdır. İnfrastruktur var və yeni daimi obyektlər tikilməyəcək ki, bu da Oyunları iqtisadi cəhətdən sərfəli və dayanıqlı edəcək. Belə bir model keçən dəfə Polşada da tətbiq olunub”.

İstanbul Bələdiyyəsinin başçısı Ekrem İmamoğlu isə qarşıdan gələn multiforumla bağlı gözləntilərini bölüşüb: “Başa düşürük ki, 2027-ci il Avropa Oyunları həm şəhərimizin tarixində, həm də Avropanın idman tarixində mühüm mərhələ olacaq. Bu Oyunlar vasitəsilə regionumuzun və Avropanın idman haqqında düşüncə tərzini dəyişməyi hədəfləyirik. İstanbul bütün qitədəki idmançılar üçün ruhlandırıcı arena rolunu oynayır. 2027-ci ildə biz bu platformanı Avropa Oyunları ilə yüksəldəcəyik”.

Belə ki, Avropa Oyunlarının ilkin proqramı artıq formalaşıb. İlin sonunda isə o, son şəklini alacaq və bundan sonra bu mövzuya daha ətraflı qayıtmaq mümkün olacaq.
İdman.biz