Azərbaycan Basketbol Federasiyasının (ABF) icraçı vitse-prezidenti Fərrux Mahmudovun Forvard.az saytına müsahibə verib.
Müsahibəni təqdim edirik:

Növbəti mövsüm əsas liqada region klublarının sayının artması gözlənilir?

Öncəliklə qeyd edim ki, hazırda liqamızda 5 region klubu mübarizə aparır. Məncə, indiki vəziyyətə görə bu normal saydır. Növbəti mövsüm üçün isə hələ ki dəqiqləşmiş bir qərar yoxdur. Federasiya olaraq cari mövsüm bitdikdən sonra gündəmdə olan bütün məsələləri müzakirə edəcəyik.

Ötən mövsüm Avrokuboklarda iştirak üçün maliyyə səbəbindən "Sabah"dan başqa digər klublar kənarda qaldı. Bu mövsüm sözügedən problemin aradan qaldırılması üçün hansı işlər görülür?

Artıq liqamızın ildən-ilə artan inkişafı hamıya məlumdur. İnkişafı görən böyük şirkətlər də, klublarla işbirliyində maraqlıdırlar və qeyd edim ki, liqamızda çıxış edən bir neçə klubun sponsor dəstəyi var. Yeni mövsümdə "Sabah" klubu ilə yanaşı digər klubların da Avrokuboklarda iştirakı gözlənilir.

Bu mövsüm Basketbol Liqasında ümumi vəziyyət necədir?

ABL-də ümumi vəziyyətdən razıyam. Həm "A", həm də "B" qrupunda gərgin və rəqabətli oyunlar baş tutur. Əminliklə deyə bilərəm ki, pley-off oyunları çox maraqlı olacaq.

Milli komandanın uğursuz çıxışları haqda hansı tədbirlər görüləcək?

İlk dəfə idi ki, basketbolçularımız Dünya Kubokunun ilkin təsnifat mərhələsində iştirak edirdilər. Basketbol adına belə yüksək səviyyələrdə iştirak etmək ümumi federasiya olaraq bizi sevindirən məqamlardandır. Milli komandamız üçün bu təsnifat mərhələsinin oyunları böyük təcrübə oldu. Ümid edirəm ki, gələcək illərdə millimiz daha uğurlu nəticələr qazanacaq.

Basketbolçu potensialı sanki çox aşağı səviyyədədir…

Bu istiqamətdə işlər planlı şəkildə aparılır. Hazırda isə biz əsas gücü regionlarda və paytaxtda seleksiya xarakterli toplanışlara vermişik. Əcnəbi və yerli mütəxəssislərimiz seleksiya zamanı kifayət qədər potensiallı həm oğlan, həm də qız uşaqlarını seçərək onları basketbol akademiyalarına cəlb ediblər. Düşünürəm ki, bu istedadlı uşaqlar gələcəkdə əsas milli komandaya fayda göstərəcəklər.

Uşaq basketbolunda vəziyyət necədir

Yuxarıda qeyd etdiyim kimi, uşaq basketbolu ilə bağlı planlarımız uğurla davam edir. Uşaq basketbolunda çalışan əcnəbi mütəxəssislərimiz bu yolda öz işlərini böyük həvəslə davam etdirirlər. Azərbaycan Basketbol Liqasında iştirak edən 12 komandanın hər birinin artıq U-12 yaş qrupu üzrə komandası da var. Onların çempionatında da mübarizə rəqabətli keçir. Bizim əsas məqsədlərimizdən biri ölkədə uşaq basketbolunu yüksək səviyyədə inkişaf etdirmək və həmin uşaqların ölkəmizi gələcəkdə əsas milli komandanın heyətində beynəlxalq arenalarda uğurla təmsil etməsidir.

Ağa Dadaşzadə