Azərbaycan Premyer Liqasının yola saldığımız XXV turunda “Şamaxı” səfərdə “Səbail”i məğlub etdi. Bu qələbə sayəsində “şir”lərin turnir cədvəlində vəziyyəti bir qədər yaxşılaşdı. Komandanın ən təcrübəli futbolçusu Kamal Bayramov həm qarşılaşma, həm də elitada qalmaq uğrunda apardıqları mübarizədən, həm də gələcək karyerasıyla bağlı Forvard. az – müsahibə verdi.

- Son turda səfərdə “Səbail”ə üstün gəldiz. Həmin qarşılaşma ilə bağlı fikirlərin maraqlıdır...

- Bizim 6 xallıq oyun idi. Belə oyunlarda gözəllik axtarmağa çalışmırıq. Məqsədimiz qələbə qazanmaq idi. Məşqlərdə komanda olaraq üzərimizdə çox çalışmışdıq. “Səbail” ilə oyunun ilk yarısında tam istədiyimiz kimi çıxış edə bilməsək də, fasilədən sonra daha yaxşı çıxış etdi və daha bir qol vurmaqla yekun hesabı təyin etdi. Düşünürəm ki, baş məşqçimizin tapşırıq-göstərişlərini düzgün yerinə yetirib bizə lazım olan nəticəni qazandıq.

- Komandanın ən təcrübəli futbolçusu kimi elitada qalmaq uğrunda mücadilədən üzü ağ çıxa biləcəksizmi?

- Rəhbərlik qarşımıza Premyer Liqada yerimizi qorumağı tapşırıq qoyub. Mən daxil, bütün oyunçular məsuliyyətimizi dərk edirik və “Şamaxı”nı elitada saxlamaq üçün səfərbər olub, yumruq kimi birləşib sona kimi döyüşəcəyik. Bu yolda həm sarsılmaz inamımız, həm də şir kimi döyüşməklə istəyimizə çatacağıq.

- Son çıxışında demişdin ki, bu sənin üçün son mövsümdür və karyeranı bitirəcən. “Şamaxı” elitada qalsa və səninlə müqaviləni uzatmaqda maraqlı olsa yenədəmi karyeranı sonlandırmağı seçəcən?

- Bu il az oynadım. Amma buna təəssüflənmirəm. Hətta mənə xoşdur ki, həmkarım Rikardo daha yaxşı çıxış edir. Mən həmişə qərarlarımda qəti biriyəm. Hər şeyin vaxtı çatanda düzgün qərarı verməlisən. Artıq getmək vaxtıdır. Düzdür, mövsümün bitməsinə hələ var, yenə şans qazanıb oynaya bilərəm. Həmçinin yayda klub rəhbərliyi ilə danışıqlarımız olacaq. Məni qapıçı kimi yox, məşqçi sıralarında görmək istəsələr düşünərəm. Amma hələlik bütün diqqətimizi Premyer Liqada yerimizi qorumağa fokuslamışıq.

- Əlçəklərini divardan asırsan, amma yolunu davam etdirən övladın var. Oğlun Səid qolkiperlikdə səni arxada qoyacağına inanırsanmı?

- Oğlumdur deyə demirəm, amma ona güvənim çoxdur. Məşqçiləri də onun perpektivi barədə nikbindirlər. O, hazırda yaşının keçid dönəmindədir. Gərək bu keçidi uğurla başa vursun. Səidin potensialı var. Amma həm üzərində gecə-gündüz işləməli, həm də savadlanmalıdır. Allah nəsib etsə, məndən daha yaxşı qapıçı olacaq.

ABDULLA İSMAYILOĞLU