Bakıda beynəlxalq gimnastika mövsümü davam edir. Bir neçə həftə əvvəl paytaxtda batut və tamblinq üzrə Dünya kuboku keçirildi və indi isə 19 ölkədən idmançıların qatıldığı idman gimnastikası üzrə analoji reytinq turniriForvard.az xəbər verir ki, ənənəyə uyğun olaraq Milli Gimnastika Arenası müxtəlif gimnastika növləri üzrə aparıcı idmançıların əsas yarış meydanlarından biridir.

Dünya ulduzları həmişə bura məmnuniyyətlə gəlirlər. Hazırkı Dünya kuboku da istisna deyil, Oksana Çusovitinanı qeyd etmək kifayətdir.

Dünyada ardıcıl 8 Olimpiadada iştirak edən yeganə gimnast kimi Ginnesin Rekordlar Kitabına düşən 49 yaşlı əfsanə idmançı Bakıda dəfələrlə çıxış edərək fəxri kürsüyə yüksəlib. Təbii ki, yenə medal uğrunda mübarizə aparır.

Bakıdakı start əslində yeni Olimpiya dövrünün başlanğıcını göstərir. Yeni qaydalar qüvvəyə minib və ona əsasən, alətlərin böyük əksəriyyətində çətinlik elementlərinin sayı 10-dan 8-ə endirilib. Bu o deməkdir ki, gimnastlar ən son yenilikləri nəzərə alaraq yeni proqramları sınaqdan keçirirlər.

Bu mənada ilk hazırlıq sınağı Almaniyanın Kottbus şəhərində keçirilən Dünya kuboku olub və komandamız həmin yarışda medal hesabını açıb. Nikita Simonov halqalarla hərəkətlərdə gümüş mükafatçı olub. İndi Avropa çempionatının mükafatçısı dəfələrlə fəxri kürsüyə yüksəldiyi bakıda uğurunu daha da möhkəmləndirməyə ümid edir. Düzdür, ötənilki Dünya kuboku Simonov üçün uğurlu alınmamışdı, amma indi yəqin ki, özünü göstərmək istəyi daha güclü olacaq.

Seriyanın özəlliyi idmançıların müxtəlif alətlərdə öz ustalıqlarını göstərmələridir. Bu o deməkdir ki, hər növün öz ustaları Bakıda çıxış edəcəklər və bu, yarışa marağı daha da artırır. Bundan başqa, iştirakçılar arasında dünya çempionatlarının və Olimpiadanın mükafatçıları da var. Onların bəziləri ötən il Bakıda qalib olub. Məsələn, amerikalı Stiven Nedoroşik dəstəli atda birinci yeri tutub, daha sonra Olimpiya Oyunlarında bu növdə bürünc medal qazanıb. Ənənəvi olaraq Yaponiya və Çin komandaları da güclü heyətlə gəliblər.

Bir sözlə, Dünya kubokunda güclü rəqabətli mübarizə gözlənilir ki, bundan hamı faydalanacaq - həm iştirakçılar, həm də tamaşaçılar.