“Turun oyunlarının keçiriləcəyi bütün stadionlar diqqət mərkəzindədir”.
Forvard.Az-a PFL-in Media və marketinq direktoru Sənan Abdullayev deyib.

O bildirib ki, Azərbaycan Premyer Liqasında XXIV turun oyunlarının qar səbəbindən təxirə salınması planlaşdırılmır: “Təbii ki, komandaların hər biri ilə daimi əlaqədəyik. İlk növbədə təbii ki, bu gün "Neftçi" - "Sumqayıt" oyununun baş tutacağı "Neftçi Arena"ya xüsusi diqqət yönəldilib. Ot örtüyünə düşmüş qarın hündürlüyü çox deyil. Yalnız cüzi buzlama var və yumşalması gözlənilir. Ardından texnikalar işə düşəcək və oyuna qədər hər şeyin qaydasında olmasına, hazır vəziyyətə gətirilməsinə çalışılacaq”.

O bildirib ki, bütün klublara qırmızı toplar da təqdim olunub: “Hər bir komanda diqqət mərkəzindədir. Hər hansı müraciət olan kimi operativ şəkildə dəstək veririk. Şamaxıda yağan qarın hündürlüyü daha çoxdur. Amma bunu təxmin etdiyimizdən daha öncədən AFFA və klubla koordinasiyalı şəkildə çalışmışıq, texnikanın sayı artırılıb. Bu dəqiqə işlərimiz hər hansı problemin olmaması yönündə sürətli şəkildə davam edir. Fors major hal olarsa, təbii ki, ictimaiyyətə məlumat veriləcək”.

Qeyd edək ki, “Neftçi” – “Sumqayıt” oyunun start fiti bu gün saat 19:00-da səslənəcək. XXIV turun digər görüşləri 22-23 fevralda keçiriləcək.