“Qaradağ Lökbatan” I Liqanın ikinci yarısına uğurla başladı. Komanda doğma divarlar arasında “Cəbrayıl”ı məğlub etdi. Lökbatan təmsilçisinin baş məşqçisi Amit Quluzadəylə komandasındakı atmosfer və qarşıya qoyulan hədəflərlə bağlı Forvard.az – a danışdı.

- Amit müəllim, çempionatın II yarısına qələbəylə başladız. “Cəbrayıl” üzərində qələbəylə bağlı fikirləriniz maraqlıdır...

- Bir qədər geniş danışacam. Mən komandaya 4-cü turda gəldim, klubda vəziyyət heç də yaxşı deyildi. Bizə həm psixoloji toparlanmaq, həm də oyun üslubunu formalaşdırmaq üçün vaxt lazım idi. Turnir cədvəlinin zirzəmisində qərarlaşsaq da, komandama qorxaq futbol sərgiləyib bir xal qoparmağı yox, kreativ oyun sərgiləmək və özünəinamı qaytarmağı aşılamağa çalışdım. Hər turdakı rəqiblərimizi analiz edərək ona uyğun taktika seçir və qələbəyə köklənirdik. 6-cı turdan başlayaraq bütün oyunlarda hücum futbolu sərgiləməyə başladıq. Hətta məğlub olduğumuz matçlar da belə yaradıcı oyun üslubuna sadiq qalır və qollar vururduq. Bütün bunları kasad heyətlə edirdik. İlk yarının son iki oyunu heyət sarıdan çox əziyyət çəkdik. İş o yerə çatdı ki, XI turda evdə “Zaqatala”nı qəbul edərkən ikinci qapıçımız olan Əli Kərimovu meydan oyunçusu kimi start “11-lik”də yer vermişdim. Bütün bu çətinliklərə baxmayaraq qış fasiləsinə kimi futbolçularıma oyun fəlsəfəmi və tələblərimi aşılaya bildim. Təbii ki, komandanı tərk edənlər də oldu. Odur ki, gedənlərin qabağını kəsmədim.

- Yeni transferlər də həyata keçirdiz. Onlar arasında təcrübəli Nurlan Novruzov, elitada oynamış Bahadur Həziyev, iranlı futbolçu Şahin Balajae də var. Bu oyunçular “Qaradağ Lökbatan”a gəlişində Amit Quluzadə amili nə dərəcə rol oynadı?

- Adlarını çəkdiyiniz oyunçulara bizdən başqa maraq göstərən klublar da vardı. Hətta sizi əmin edirəm ki, bizdə verilən maaşdan ən azı iki qatını təklif edən komandalar vardı. Amma o futbolçular mənim dəvətimi, xahişimi yerə salmayıb, bizi seçdi. Onların hər birinə minnətdarlığımı bildirirəm.

- Başqa transferlər olacaqmı?

- Xeyr, əlimizdə olan futbolçularla kifayətlənəcəyik.

- Heyətinizdə iki legioner oyunçu olsa da, onların hər biri azərbaycanlıdır. Həmin futbolçulardan əsas da qapıçı İlnur Vəliyev hələ “Sumqayıt”da çıxış edərkən Azərbaycan vətəndaşlığına keçmək və ən böyük arzusunun yığmamızda oynamasını bildirmişdir. Qolkiperə Azərbaycan pasportunun verilməsi üçün işlər görülürmü?

- Bizdə hər iki oyunçunun, əsas da İlnurun yerli oyunçu statusu almasında maraqlıyıq. O, perspektivli qapıçıdır. Ona Azərbaycanlı pasportu verməklə futbolumuza yeni “əlcək sahib”i qazandırmaq olar. Müəyyən müddətin keçməsini gözləyirik, ondan sonra İlnur Vəliyevə ölkəmizin pasportunun verilməsi üçün aidiyyatı qurumlara müraciət edəcəyik.

- Amit Quluzadə “Qaradağ Lökbatan”ı bataqlıqdan çıxara biləcəkmi?

- Deməzdim ki, bataqlıqdayıq. Aşağı pillərdəyik, bu da təbii ki, bizim layiq olduğumuz yer deyil. Məqsədimiz maksimum təhlükəli zonadan uzaqlaşmaq və bacardıqca yuxarı pillələrdə qərarlaşmaqdır. Biz hər oyuna final matçı kimi çıxırıq. Futbolçularımla birgə qarşımıza qoyduğumuz hədəfə nail olacağımıza inanıram.

ABDULLA İSMAYILOĞLU