
Futbol / Gündəm
3.02.2025, 01:42
Kənan Kərimov: “I Liqada zəif rəqib, autsayder yoxdur”
Ötən həftə I Liqanın ikinci yarısına start verildi. Baş tutan qarşılaşmalarda maraqlı nəticələr qeydə alındı. Çempionluq uğrunda mübarizə aparan “Qəbələ”, “İmişli”, “Karvan” xal itkisiylə başladı. Doğma meydanda “Difai Ağsu”nu qəbul edən “Karvan” ciddi müqavimətə rast gəldi. Yevlax təmsilçisinin baş məşqçisi Kənan Kərimov xal itirdikləri matçla bağlı Forvard.az – a danışdı.
“Bu gün çoxları bizi qınayır ki, turnir cədvəlinin aşağı pilləsində qərarlaşan komandanı məğlub edə bilməmişik. Amma reallığa qalanda turnir cədvəlindəki mövqeyindən asılı olmayaraq hər bir komanda təhlükəli və güclüdür. Baxın, çempionatın ikinci yarısının startında “Qəbələ” doğma divarlar arasında “Baku Sportinq”in müqavimətini qıra bilmədi, “İmişli” MOİK-ə məğlub oldu. Dediklərimi onu göstərir ki, I Liqada zəif rəqib, autsayder yoxdur. Oyuna gəlincə, “Difai Ağsu” ilk yarıya çox istəkli başladı və erkən qol vurdu. Hesabın açılmasından sonra irəli atılıb qısa zamanda tablodakı rəqəmləri tarazladıq. Amma qonaqlar aqressivliyini davam etdirərək növbəti qolu vurdular. Bizdə cavab qoluyla cavab verdik. Hissəinin sonlarında hakim qapımıza penalty təyin etdi. Amma mənə görə həmin epizod mübahisəliydi. Rəqib “11 metrə”ni dəqiq tamamlamaqla fasiləyə üstün yollandı. İkinci yarıda toparlanaraq daha yaxşı çıxış etdik. Çoxsaylı qol imkanlarımız olsa da, onlardan birindən yararlanaraq məğlubiyyətdən qaça bildik. Bu oyundakı səhvlərimizdən dərs çıxarıb, irəli baxacağıq”.
Xatırladaq ki, I Liqanın XII turunda “Karvan” – Difai Ağsu” görüşü 3:3 hesablı sülhlə başa çatıb.
ABDULLA İSMAYILOĞLU
Son xəbərlər
Ən çox oxunanlar
- Bu gün
- Bu həftə
- Bu ay