Azərbaycan Premyer Liqasının yola saldığımız XX turunda “Səbail” dogma divarlar arasında “Kəpəz”i məğlub etdi. “Dənizçilər”in ukraynalı futbolçusu Dmitro Litvin həm oyun, həm də qarşıdakı turlarla bağlı Forvard.az – a danışdı.

- “Kəpəz” üzərində qələbəylə bağlı fikirlərin maraqlıdır…

- Oyunla bağlı müsbət düşüncələrdəyəm. Elitada qalmaq uğrunda başlıca rəqibimizlə qarşıdurmada yaxşı mübarizə apardıq. Uşaqlara afərin meydanda güclərini qoydular. Layiqli qələbə qazandıq. Qol imkanlarımız çox olsa da, cəmi birində son nöqtəni qoya bildik. Ümumi götürəndə maraqlı oyun alındı, düşünürəm ki, azarkeşlər də futboldan zövq aldı.

- Döyüşkən oyun olsa da, cəmi bir qol qeydə alındı. Səncə, fərqi artıra bilməməyinizin səbəbi nədir?

- Dediyim kimi növbəti qolları vurmaq üçün şanslarımız vardı, sadəcə yararlana bilmədik.

- Artıq iki turdu qələbə qazanırsız, sizə lazım olan uğurlu yolu tapmısızmı?

- Yaxşı komandamız var, potensialımız böyükdür. Qış fasiləsində yaxşı toplanış keçdik, prinsip etibarıyla çempionatın II yarısına hazırıq. Hazrkı əhval-ruhiyyədə davam etməliyik, arxayınlaşmaq olmaz.

- Cavid Hüseynovun gəlişiylə “Səbail”də nə dəyişdi, Onu məşqçi kimi necə xarakterizə edərdin?

- Məşqçimiz bizə taktiki məsələlərdə yeniliklər gətirdi. Futbolçuların mövqelər üzrə necə mübarizə aparmaları, açılmalar etmələri və s. haqqında məşqlərdə bizə lazımi göstərişləri veirir. Bizim də həm yaxşı kollektivimiz, həm də komandamız var. Məşqlərdə və oyunlarda məşqçimiz tapşırıqlarını maksimum yerinə yetirməyə çalışırıq.

- “Səbail” in uğurlu seriyaları davam edəcəkmi?

- Uğurlu seriyamızı başlatmışıqsa, deməli onun ardını gətirməliyik. Əsas odur ki, arxayınlaşmaya yol vermədən hazırkı tempi qorumalıyıq.

ABDULLA İSMAYILOĞLU