
Futbol / Gündəm
23.01.2025, 18:15
Vladislav Veremeyev: “Oyundan-oyuna daha yaxşı formaya düşəcəyimizə inanıram”.
Misli Premyer Liqasının II yarısı həm komandalarda, həm çempionatımızda debüt edən oyunçularla diqqət çəkir. Onlardan biri də “Şamaxı”nın ukraynalı yeni transferi Vladislav Veremeyevdir. Futbolçu “Qarabağ”la oyunun ikinci hissəsində “şirlər”in heyətində debüt etməyi bacardı. Veremeyev həm debütü, həm də çempionatımızla bağlı ilkin təəssüratını Forvard.az- a bildirdi.
- Artıq “Şamaxı”da debüt etdin. Bu barədə fikirlərin maraqlıdır
- Bəli, yeni komandamda debüt etdim, meydanda həyacanı daddım, xoş oldu. Mənə göstərilən etimadı doğrultmağa çalışacam.
- “Qarabağ”dan bir xal qoparmaq üçün nə çatmadı?
- Komandamız oyuna yaxşı təsir bağışladı. Əks hücumlarda effektli idik. Səhvlərimizdən dolayı lazımsız qollar buraxdıq. Amma bir daha vurğulayıram ki, məğlubiyyətə rəğmən komanda olaraq yaxşı mübarizə apardıq. Oyundan-oyuna daha yaxşı formaya düşəcəyimizə inanıram.
- “Şamaxı” və Azərbaycan çempionatı haqqında nə deyərdin?
- Hələ burda yeniyəm, daha çox müşahidə edirəm. Düşünürəm ki, bir neçə oyun keçdikdən sonra daha dolğun fikir bildirə bilərəm.
- Çempionatımızda çıxış etmiş və hazırda da oynayan ukraynalılar var. Onlardan kimlərisə tanıyırsanmı və ya Premyer Liqamızla bağlı rezüme verənlər oldumu?
- Bəli, Azərbaycanın güclülər dəstəsinə gəlməmişdən əvvəl burda vaxtilə oynamış həmvətənlərimdən demişdilər ki, orda çempionat çox gərgin, mübarizəli keçir. Azərbaycanda həm yaxşı stadionlar, həm də hazırlıqlı komandalar var. Artıq deyilənləri görməkdəyəm.
- Azərbaycanı ölkə olaraq necə dəyərləndirərdin?
- İlkin təəssüratım dövlətiniz və xalqınızla bağlı yaxşıdır. Gözəl ölkəniz, paytaxtınız, insanlarınız var və bu mənə xoş gəlir.
ABDULLA İSMAYILOĞLU
Son xəbərlər
Ən çox oxunanlar
- Bu gün
- Bu həftə
- Bu ay