Bu gün “Qarabağ” doğma divarlar arasında “Şamaxı”nı qəbul etdi. Gərgin keçən oyunda Ağdam təmsilçisi rəqibini 3:2 hesabıyla məğlub etdi. “Atlılar”ın qapı xətdində Şahruddin Məhəmmədəliyev yer alırdı. O, həmçinin komandanın kapitanı kimi də meydana çıxmışdı. Matçdan sonra yığmamızın “1 nömrə”si Forvard.az – a danışdı.

- Bu gün “Qarabağ”ı kapitan olaraq meydana çıxardın və “Şamaxı” üzərində qələbə qazandız. Oyunla bağlı təəssüratların maraqlıdır...

- Fasilədən sonra oyun çətin olur. Bu gün ağır matç keçirdik, çoxdan idi oynamırdıq. İstədiyimiz kimi norma dincəlməmiş, hazırlıq üçün vaxtımız da az olmuşdu. Amma əsas odur ki, qələbə qazandıq. Bu vacib idi. Kapitanlıq sarğısına gəlincə, ilk dəfə deyil lider kimi komandanı meydana çıxarıram. Etibar edir, güvənirlər, mən də öz növbəmdə komandam üçün əlimdən gələni edirəm və edəcəm də.

- Travma aldığından formanı bərpa etmək üçün xeyli vaxt keçdi. Hazırda özünü necə hiss edirsən?

- Özümü yaxşı hiss edirəm, zədəm sağalıb, istədiyim formaya düşməyə çalışıram. Yalnız havalar soyuyanda bir qədər zədələnmiş əlimdə ağrılar hiss edirəm. Ümumi götürəndə isə hər şey qaydasındadır.

- Bu gün iki qol buraxdın. Müdafiənizdə ciddi boşluqlar var yoxsa rəqib kəsərli hücumlar edirdi?

- Komanda olaraq qol vurur və qol buraxırıq. Təbii ki, “Şamaxı” yaxşı hücumlar təşkil edən klubdur. Rəqiblə Şamaxıdakı oyunlardada onlar hücumda maksimum təzyiq edib qapımıza yol tapmışdılar. Sadəcə qolu hesaba almadılar. Düşünürəm ki, səhvlərimiz üzərində işləməliyik. Belə asan qollar buraxmaq olmaz.

- Qarşıda avrokubok oyunlarınız gəlir. Şanslarınızı necə dəyərləndirərdin?

- Cuzi şansımız varsa belə, ondan maksimum yararlanmalı və sona qədər döyüşməliyik. Avrokuboklarda Azərbaycanı təmsil edirik. Ona görə də əvvəlcə ölkənin adını, sonra isə komandanı düşünməliyik. Təəssüf ki, zədələndiyim üçün Avropa Liqasındakı turnirində sifariş ərizəsinə düşə bilmədim. Halbuki, komandama fayda verməyi çox istərdim.