
Ayaz Quliyev: "Biz bu təzyiqə öyrəşmişik"
"Sabah" 17-ci turda "Araz-Naxçıvan"ı məğlub etməklə diqqət çəkdi. Vasili Berezutskinin gəlişindən sonra Masazır təmsilçisi daha yaradıcı oynamaqla turnir cədvəlində irəliləyir. "Bayquşlar" hazırda turnir cədvəkində beşincidirlər. "Sabah"ın və yığmamızın üzvü Ayaz Quliyev son oyunlardakı uğurlu çıxışları ilə bağlı Forvard.az-a danışdı.
- "Araz-Naxçıvan"ın uğurlu seriyasına son qoyduz. Bu barədə nə deyərdin?
- Hər iki komanda meydanda yaxşı oynadı, layiqli mübarizə apardı. İlk yarıda tərəflər daha ehtiyatlı oyuna üstünlük versə də, fasilədən sonra daha kreativ futbol gördük. Layiqli qələbə qazandıq.
- Berezutskinin gəlişiylə daha yaxşı oynayır və xallar qazanırsız. Bunun sirri nədir?
- Bunun sirr olmasını deməzdim. Hər bir baş məşqçinin oyuna və komandaya fərqli yanaşması var. Berezutskinin yanaşması bizə uyğundur. Taktikada müəyyən dəyişikliklər var. Sadəcə biz üzərimizdə az işləyirik, odur ki, performansımızı maksimum artırmalı və daha kreativ oynamalıyıq. Düşünürəm ki, yavaş-yavaş bu istəyimizə nail olacağıq.
- Berezutski "Sabah"da güclü komanda formalaşdırmaqla, "bayquşlar"ın turnir cədvəlində ilk "3-lük"də yer alacağına inanırsanmı?
- Əlbəttə inanıram. Unutmayın ki, ötən mövsümdə də tənəzzüldə idik, amma turdan-tura artıraraq mükafatçılar sırasında qərarlaşmağı bacardıq. Bunu yenə edə bilərik. 5-6-cı yerlərdə qərarlaşmaq bizim üçün uğur deyil. Bəli, çempionatın ilk yarısında çoxlu xallar itirdik, amma hələ heç nə bitməyib. Qarşıda çoxlu və vacib oyunlarımız var. Uğurlu nəticələr qazanacağımıza və layiqli yerlərdə qərarlaşacağımıza şübhə etmirik.
- Qış fasiləsindən sonra Premyer Liqada daha qızğın, amansız mübadizə gedəcək. Bu sizi qorxutmur?
- Çempionatın II yarısı həmişə gərgin keçir. Biz bu təzyiqə öyrəşmişik və məsuliyyətimizi anlayırıq. Odur ki, hər oyuna final matçımız kimi yanaşaraq maksimum xal götürməyə fokuslanacağıq. Düşünürəm ki, istədiyimizə nail olacağıq.
ABDULLA İSMAYILOĞLU
Son xəbərlər
Ən çox oxunanlar
- Bu gün
- Bu həftə
- Bu ay