Dünən 16 Dekabrda Bakıdakı Four Seasons hotelində Azərbaycan Milli Antidopinq Agentliyinin (AMADA) təşkilatçılığı ilə "Təmiz qələbə: Olimpiya ilinə yeni baxış" adlı beynəlxalq konfrans keçirildi. Baş tutan tədbirdə idman yarışlarında gender bərabərliyinin gözlənilməsinin əhəmiyyətindən də danışıldı. Tədbirdə iştirak edən futbol üzrə Azərbaycan yığmasının sabiq üzvü Aslan Kərimov da iştirakçılar arasında idi. Veteran futbolçu konfransla bağlı fikirlərini Forvard.az - a açıqladı.

"Belə tədbirlərin ölkəmizdə keçirilməsi çox xoşdur. Həmçinin bu cür beynəlxalq konfranslar həm bizim, həm də başqa ölkələrin idmançıları üçün faydalıdır. Bildiyiniz kimi bu yay Parisdə keçirilən Yay Olimpiya oyunları zamanı gender bərabərliyinin pozulmasıyla da yadda qaldı. Mən demokratik dəyərlərin və qadın-kişi hüquqlarının qorunmasının əlehinə deyiləm. Amma bu o demək deyil ki, "demokratik dəyərlər" adı altdında idman prinsipləri ayaqlar altına alınmalı və idmanıçıların hüquqları pozulmasına rəvac verilməlidir. Çox təəsüflər olsun ki, son olimpiyada zamanı transgender ilə qadınlar arasında yarış keçirməklə həm gender bərabərliyi, həm də idman prinsipləri aşkarca pozuldu. Yaradılışdan və təbiətdən gələn dəyişməz qayda var ki, qadın ilə kişinin fiziki gücü və fizioloji bədən quruluşu fərqlidir. Məhz bu fərqlilikdən dolayı da hər cins öz cinsi və müvafiq çəki üzrə yarışmalıdır. Eləcə də qadın ilə kişilərin yarışmasında mövcud normativlər dəyişdirməyə cəhd heç bir məntiqə sığmır. İstər bir insan, istər idmançı, istərsə də azərbaycanlı olaraq idmanda bu cür əməllərə yol verilməsini qınayıram. Xoş hal odur ki, artıq Avropada da bu məsələnin həlliylə bağlı işlərə başladılıb. İnanıram ki, ölkəmizdə təşkil olunan antidopinq tədbirində qadın və kişi idmançılarının hüquqlarının qorunmasıyla bağlı səsləndirilən fikirlər əməldə də həyata keçiriləcəkdir".

ABDULLA İSMAYILOĞLU