
Bədavi Hüseynov: “AL-da hələ də şanslarımız var”
Misli Premyer Liqasının 17-ci turunun bağlanış oyunu “Qarabağ” – “Sumqayıt” görüşüylə baş tutdu. Tofiq Bəhramov adına Respublika stadionunda keçirilən qarşılaşmada ağdamlılar rəqibini 5:0 hesabıyla darmadağın etdi. Matçdan sonra “atlılar”ın kapitanı Bədavi Hüseynov Forvard.az – a danışdı.
-“Elfsborq” səfərindən sonra doğma meydanda “Sumqayıt”ı darmadağın etdiz. Oyunla bağlı fikirlərin maraqlıdır...
-Ağır səfərdən qayıtmışdıq. Həmçinin rəqibimizin də yaxşı formada olduğunu bilirdik. Onlar yeni məşqçinin rəhbərliyi altında 12 xal toplayıblar. Əks-hücumda oynamağı bacarırlar. Odur ki, belə ciddi rəqiblə ehtiyatlı oynamalı və qələbə qazanmalıydıq, bizə xal lazım idi. Səfər yorğunluğuna baxmayaraq, meydana çıxdıq, mübarizə apardıq və vacib qələbə qazandıq.
-İsveçdə uğursuzluğunuz səbəbi nə idi? Toparlanmaqda çətinlik çəkdiz yoxsa şansız gün idi?
-Deməzdim ki, pis oynadıq. Topa nəzarət bizdəydi, həmçinin yaxşı qol imkanlarımız da oldu. Avropa Liqasının hazırkı mərhələsində nədənsə bəxtimiz gətirmir. Matçlarda yaxşı oynayır, çoxsaylı qol imkanları yaradırıq, amma fərqlənə bilmirik. Bunun üzərində çox çalışmalıyıq. Həvəsdən düşmürük, irəlidə daha iki oyunumuz var. Həmin matçları müsbət notlarla tamamlamalıyıq. Hələ də şanslarımız var. Keçirdiyimiz oyunların hər birinə nəzər yetirib nəticə çıxaracağıq.
-“Kimyaçılar”la oyunun ilk yarısında travma alaraq əvəzləndin. Zədənlə bağlı ilkin diaqnoz necədir?
-Ümid edirəm ki, ciddi nəsə yoxdur. Bir qədər ağrı hiss etdim və əvəzlənməyimizi istədim. Sabah MRT müayinəsi olacaq və ondan sonra daha dəqiq bilinəcək.
-“Sumqayıt” üzərində böyük hesablı qələbədən sonra yenidən zirvədəsiz. Qarşıda ən yaxın izləyiciniz “Araz-Naxçıvan”la oyununuz var. Qış fasiləsinə lider kimi yollana biləcəksizmi?
-Təbii ki, qələbə qazanıb qış çempionu kimi fasiləyə yollanmaq istəyirik. Amma bizə asan olmayacaq. “Araz-Naxçıvan” çox güclü komandadır, onlar döyüşkən futbol sərgiləyirlər. Muxtar Respublika təmsilçisi 16 oyun idi məğlub olmurdular, həmçinin “Sabah”a uduzduqları qarşılaşmada da oyun planında üstün idilər. İstənilən halda bizi gərgin matç gözləyir.
ABDULLA İSMAYILOĞLU
Son xəbərlər
Ən çox oxunanlar
- Bu gün
- Bu həftə
- Bu ay