Dünən “Neftçi” doğma divarlar arasında “Zirə”ni məğlub etdi. Qarşılaşmadan sonra “ağ-qaralar”ın yarımmüdafiəçisi Rəhman Hacıyev “qartallar” üzərində qələbə və komandasının gələcək hədəfləri ilə bağlı danışıb.

-“Zirə” üzərində qələbəylə bağlı fikirlərin maraqlıdır...

-Uzun müddətdir ki, qeyri-stabil çıxış edirik. Bu da təbii ki, bizə təsir edir. “Zirə” ilə oyun bizim üçün çox vacib idi. Layiqli qələbə qazandıq. Qarşıda bizi “Qarabağ”la daha ağır qarşılaşma gözləyir. Düşünürəm ki, zirəlilər üzərində qələbə “suvarilər”lə matç üçün bizə əlavə motivasiya verdi.

-Səncə, komandanın tam toparlanması üçün nə qədər vaxt lazımdır?

-Bizə müəyyən zaman lazımdır. Bir müddət uğursuz çıxışdan sonra arzuolunan nəticələrin gəlməsi üçün dəyişiklər üçün çox işləməliyik. Bunun üçün bizə müəyyən vaxt lazımdır. Qısa müddətdə hər şeyi dəyişmək olmur. Əsas odur ki, qış fasiləsinə kimi kreativ oyun sərgiləyib maksimum çox xal toplamağımızdır. Qışda bizi yaxşı toplanış gözləyir. Bu hazırlıq çərçivəsində çatışmazlığımızı aradan qaldırıb çempionatın ikinci pərdəsində daha yaxşı çıxış edəcəyik.

-Samir Abasovun komandanın nəbzini tuta bilibmi?

-Samir müəllimlə birgə “Sumqayıt”da çiyin-çiyinə futbol da oynamışam. Onun necə xarakterdə və istəkdə olan biri olduğunu yaxşı bilirəm. Hazırda o, da komandamızda yenidir. Mövcud vəziyyətimiz həm Samir müəllim, həm də bizim üçün çətindir. Buna rəğmən yumruq kimi bir olub vəziyyətdən çıxacağımıza inanıram. Samir Abasov nəticə verən məşqçidir. Zamanla “Neftçi” əvvəlki qüdrətini bərpa edəcək.

ABDULLA İSMAYILOĞLU